【廣告觀點】男人的浪漫

(原載於:廣告狂人

作者:Tom Chung

 

10525387_870641446297793_7485178463585104138_o

 

男人,其實幾需要浪漫。

男人的浪漫 = 孤獨的狼 + 無人明白自己 + 橫眉冷對千夫指 + 英雄感 + 看透世事

有關「男人的浪漫」,請參考高登潮文,的確係有呢個Formula的。

所以,男人的浪漫,可以係「豆腐火腩飯」,亦可以係「大班冰皮月餅」。

 

 

今年大班的廣告,真真正正地飛甩老土,玩「浪漫」。

鄭子誠的演繹,絮絮不休的獨白,其實係高登潮文變奏版。

假如「豆腐火腩飯」有謝霆鋒的《潛龍勿用》點綴,這裡便有王傑的《誰明浪子心》點睛。

男人有頭家,但想重拾浪子的情懷,你笑佢中年危機也好,你話佢攞嚟賤都好,佢唔理,因為「無人明白孤獨的狼」。

因為是「孤獨的狼」,所以自覺「好型棍」。

 

男人的浪漫,是需要一點英雄感,嗯,就先將兩條「登月浪子」捧上天,Moon walk再插旗,將他們變成男人膜拜的圖騰。

男人即使睇唔透枝青島,但都可以看破壽司店「戇鳩鳩,生勾勾」的荒謬,同樣地,月亮上的荒蕪,從來逃不出男人慧眼,「嫦娥唔出現?預咗啦!」。

一眨眼,男人穿上太空衣,「要改變呢個世界,就需要嗰一份勇氣……決定踏出個人嘅一小步」,個Mission大到「改變世界」,英雄感澎湃到瀉。

結果,老婆反面、老豆鬧忤逆、阿媽以為佢傻咗、阿爺恥笑佢、兒啼妻哭,無人明白自己。

最後,男人好孤獨咁坐在月下一個人食大班冰皮月餅,橫眉冷對千夫指……

跟手再讚一下男人敢於嘗試的勇氣…..

男人的浪漫,正式育成。

 

其實影片很多值得思考咀嚼的地方。

1. 譬如有網友評,買冰皮月餅畀老豆鬧忤逆是傻的嗎……但請記住,這個故事發生在25年前《誰明浪子心》作為「新歌」的年代,那些年,對不少老人家來說,冰皮月餅呢啲「新屎坑」,有「不尊重長輩」味道,從前的人,會「做月餅會」,每個月「供會」,累積一年心意送給長輩,長輩會覺得你有心。但一打開見到「冰皮」,白雪雪咁,傳統來講就唔多吉利,而且冰皮月餅價格比傳統月餅平一截,好容易畀長輩標籤為「冇心肝、唔識禮數、冇家教」等等,那段日子,真係今日年輕人難以理解的。

2. 過去的大班冰皮廣告,多多少少會將焦點放在「大班是全港首創冰皮月餅」上面,老實講,又係「客戶想講 vs 消費者想知」的謎思,邊個care究竟邊個發明?客戶囉!但今次廣告一改陋習,將勇於創新這個「Hero」放在「踏出一小步的消費者」身上,激發男人的英雄感,感覺自然更加良好。

3. 寫這篇評論之前,廣告狂人兩位主編曾作過這方面的討論:買月餅送禮這些事,一向女性主導,點解呢一個廣告要採取「男人的浪漫」呢種「高登男性向」角度?我們不約而同地覺得,可能傳統送禮市場「大局既定」,唯有開拓新市場,而新的Target,就是我倆這種會買冰皮月餅「獨食」的獨男……

 

假如個Creative brief 係咁樣Targeting,似乎又做得幾中。

廣告狂人,其實都幾浪漫……