年輕人,他朝都會變成老屎忽

 

(photo via cc Flickr user Ryan Hyde)

 

係咁意寫下:今日既年輕人,會變成他朝既老行尊,亦即係老海鮮。只要有高高在上既感覺,就係自爆既前奏。可謂屢應不爽。

固步自封,最後必然會引發災難。可能舊時呢套係work,甚至係絕世好橋,但到左今日,你仲用陳舊既橋,觀眾梗係笑都唔笑啦。最慘係佢連去問下自己都唔問下。包圍住既人又全部真心膠,或唔敢問。今次林鄭參選,將佢既所有缺點都一下子暴露人前。一個三十年可以確保政策運作暢順既所謂建制精英,原來根本不知人間何世。你可以美其名話不吃人間煙火,但果個唔敢接觸外界,連FB都諗緊應唔應該開既一種孤高/永遠岩晒既態度,從呢方面講,甚至比唔上葉劉淑儀。

無疑,係人都知人老左,經驗會有增長,會所謂既識做人,識睇通眉頭眼額,呢D所謂好高級既行政經驗或者高階野。但係如果你突然之間要走番入民間,唔好講選戰,單單去run 一個project,搞一個event,要做到面面俱圓,每一個關節都妥善處理,甚至連技術位都兼顧埋,係依家呢個世代,真係唔會有成功既捷徑。其餘一間公司入面,上面玩management 多數廢既,中間果堆管唔會出事既先係精英。

唯一可以講既,就係不斷學習,不斷維持自己對呢個世界有好多好奇心。其他野例如詩經文學,變幻既速度就會比較慢,但係電腦科技,網上雲端,溝通方式,發展完全係一日千里。programmer 都或者要不斷學新language 去等自己唔好變舊電池。其實眾生平等,態度一致,唔係話要你追求到咁pro,但起碼你都要有基本認識呀。

好多人都仲懷緬自己叱吒風雲既時光。但無理會過其實佢引以為傲既野,後生一個掣或者google一下已經識做。所以我成日覺得老細如果只係識指點人做,自己唔識做,都係廢的,下面邊會服你,仲會搵次俾蕉皮你,你都唔知。我地都要日日鬧下自己,唔好他日都變埋老海鮮,阻住地球轉。