大學生物圖鑑:自由騎士都有咁L多屬性?

 

一sem容易又midterm,又到咗N份group project既死線時期,亦係自由騎士(free-rider)原形畢露之時! 你以為自由騎士真係得自由系咁簡單? 少年你太年輕了,自古以黎,可怕既生物又豈止一種?今次筆者就綜合咗呢幾年係大學生態入面觀察/聽聞/接觸過,一共八種屬性既自由騎士,等大家一齊探討下呢種極度神憎鬼厭既大學生物。

 

1.樹木系自由騎士

 

嚴格嚟講,呢種都唔係一心向自由發展既騎士,只不過係呢種騎士反應比較慢,當佢仲好似碌木咁停滯咗,細心地思考緊份野應該幾時開始做既時候,佢班神(經)隊友已經遠係deadline前既一星期,甚至更早完成曬成份project(再恐怖D既係已經同你係Blackboard到submit埋)。當樹木系自由騎士終於回魂,懷住「我今日一定要做到野」既決心打開google drive個陣,先惘然地發覺自己已經係不知不覺間俾隊友carry咗,成為隊內被freeride既自由騎士。

呢一刻,由於打擊太大,該品種既自由騎士舉起雙手投降,形成樹枝既形態,搭上臉上表示驚嘆既o型嘴,形成樹幹中既樹窿,此等形態,實屬樹也,故被命名為「樹木系自由騎士」。

危險系數:★ (因為有神隊友carry,對團隊打擊既程度唔大)

 

2.神秘系自由騎士

 

呢種自由騎士簡直係謎一般既生物,除左佢個名同student ID之外,你對於佢既認知可以話係近乎零,因為佢地出沒既地方僅限於第一堂分組同埋final test個下(期間限定:D),其他時間,包括當你想傾又或者做group project個陣,佢係可以完全無出現過嫁!無論你點whatsapp定打電話轟炸佢都好,你都係搵唔到佢既蹤影,你話呢位自由騎士係咪好有神秘感呢? 有時你甚至會諗,究竟佢係咪已經成為咗警訊入面個D失蹤人士呢? 但就算touchwood你係電視到見到佢,你都唔會知個個係咪佢,因為佢已經深潛到你連佢個樣係點都唔記得……

危險系數:★★(因為佢一早已經唔見咗,所以團隊已經預咗會做埋佢個份)

 

3.風系自由騎士

 

「風~ 繼續吹~」無錯,呢種自由騎士完全體現到風屬性既精神,就係得把口,淨係識得係咁吹,每次開meeting個陣就意見多多,講就天下無敵:

「呢part cut咗佢啦都無用既~ 」
「呢到我覺得可以咁樣做囉!做咗包我地拎靚grade!」
「如果呢到加埋呢part咪幾好!」

做就無心無力!先唔講佢D偉大既建議有冇用先,淨係叫佢實際幫手去做,佢都可以好意思繞埋雙手咩都唔做,俾完意見拍拍屁股就走得,彷彿啱先講個D野同佢自己個part最後會好似神蹟咁識得自動實現,真係好神奇呀!(拍手) 佢就吹得開心,最後咪又係我地呢班狗奴才幫佢做埋佢個份!有時候風系自由騎士都會好好人咁幫你做下既,咪就係幫你執下個format咁囉! 嗱,font size較大少少,置中下個標題,打埋自己個名同student ID落份report/ppt到…… 咪話我唔讚佢地啦,佢地真係好有建設性嫁!

更可怕既係,有時候呢種人俾既意見仲要係錯到七彩,搞到大家開meeting都聽到一額汗,幫唔到手之餘,仲要搞亂曬成個flow,批評曬所有人做既野,損害士氣,呢種風系自由騎士真係好X攞命呀!

危險系數:★★★

 

4.水系自由騎士

 

水系自由騎士主要有兩種,一種係事先聲明型,一種係事後蒲頭型,佢地既共同點就係都係會用D楚楚可憐既原因,去解釋點解自己做唔到份project,然後非常有禮貌咁一句「對唔住呀!」,就成功地拉曬成組人落水,將自己個part扔曬俾其他組員做,有時佢地更會加以可憐既目光同聲線,令到groupmate動之以情,係安慰佢既同時,亦都好無奈地心甘命抵咁幫佢做埋佢個part。

但其實事後你再仔細D諗下,個D原因通常都係好唔合理,甚至乎係假既(真係病/屋企有事等合理原因唔計算在內),例如我呢排成日都要去朋友聚會、要返工或者心情差等等,所以我就做唔到我個part啦,對唔住呀! 嘩!咪住,你班hihi呢D咩理由黎? 朋友聚會咪姐係同friend去玩? 返工咪姐係去賺錢?你地憑D咩可以用我幫你做project既時間,去換取你係外面逍遙快活去玩同去賺錢既時間? 點解唔一早安排好時間做咗先? 敢問閣下良心何在? 另外「心情差」呢個理由簡直令人瞪目結舌,你心情差做唔到野就可以要我心情差咁幫你做野? 如果你背後有其他更實際既原因講出黎既話,我會去體諒,但唔好同我講完你心情差到做唔到野之後,轉頭就俾我見到你IG,發現你係到風流快活先得嫁? 親,你是想要老娘的命嗎?

危險系數:★★★★

 

5.火系自由騎士

 

呢種自由騎士心入面係有團火,雖然佢地滿腔熱誠咁表明會做野,但最尾交出黎既竟然係一大段維基百科既資料,又或者係一大段錯既野,搞到成份project同成組組員都即刻着曬火,除咗要delete佢段野之餘,仲要係deadline前個幾個鐘即刻做埋佢個part,以免全組同佢玉石俱焚,以爛grade自盡,情況尤如警察緊急制服自殺式炸彈恐襲者,切實地考驗團隊既緊急應變能力。

有時更加恐怖既係,當呢種自由騎士一旦走火入魔,佢仲會識得開大技,除咗堅持自己個part無問題之外,仲會亂咁改埋人地個part,改到成件事錯曬,最終搞到通街都着曬火,同組組員必定嬲到個頭可以出煙,如果個下咁岩附近有煎pan,你大可以嘗試將煎pan放係個組組員既頭上,相信可以實行無火煮食,不過當下閣下既安全,在下就實在唔能夠擔保啦。

團隊危險系數:★★★★★★

 

6.土系自由騎士(米田共系)

 

相傳農夫會將糞便化肥,給米田共回歸泥土,好讓它們為耕作物提供營養,有鑑於此,筆者又將此等自由騎士,歸類為土系自由騎士。

此等自由騎士,其厭惡程度,與米田共相若。順口開河,毫無交帶,事前他答應會完成自己的部份,老娘也真誠地報以友濟間之信任,誰知該名人士竟於deadline前數小時人間蒸發,音訊全無,嚇至全組組員一致呈現名畫吶喊的表情,趕緊亡羊補牢,最終時間不足,被迫上繳米田共,實為無奈,嗚呼哀哉!

危險系數:★★★★★★★

 

7.無恥系自由騎士

 

故名思義,呢種自由騎士係freeride完後,仲會厚顏無恥咁同其他人認叻,將所有功勞歸納曬係佢自己身上,見到呢種人,除咗嘔血,我仲想講:

人嚟,同我攞把尺嚟度下佢地塊面皮有幾厚,睇下係咪已經厚到可以衝出地球,穿過太陽,直達銀河系!如果係既話,唔洗再發明火箭啦!淨係坐係free-rider塊面到,調較下佢個頭既角度,再叫佢發動無恥既言論,咁就可以直達太空內唔同既星球,成為新一代既交通工具啦Yeah!

危險系數:★★★★

 

8.混合型自由騎士

 

將第1-7類屬性混合,定可成為極品混合型自由騎士!

危險系數: ★★★★★★★★★★★★★

 

最後,在此呼籲各位自由騎士早日改過自身(樹木系係無辜嫁!),做返個有責任感同有交帶既人,唔係你遲早出到社會都係會跌倒在街上,到時就後悔莫及,加油啦!