良心Sales手記——五種運桔的方法

(photo via cc Flickr user Jaysin Trevino)

 

舖頭一日開十個鐘,其實運桔嘅人可能佔左三分二。我地初步估算過,如果每個運桔嘅人都真係運一盤桔入黎,我地應該可以開桔園。以下係我綜合過去經驗歸納出黎嘅五種運桔方法。

 

1) 摸錯門牌

我知有好多牌子嘅首飾其實都差唔多樣,但係大大個招牌响出門,唔知點解都會認得錯,除左因爲佢地係文盲之外,我都諗唔到其他理由。試過有個嬸嬸入到黎話要搵啲我地無嘅嘢,話俾佢知我地唔係嗰個牌子,佢死都話之前喺我地度買過嘢,講極都覺得我地呃佢咁。最後我阿姐爆佢seed,將個牌子名逐隻字母讀出黎:「太太,我地係B-B-B-B-B,你講嗰個牌子係A-A-A-A-A,之前係嗰邊,執左啦!」

嬸嬸最後死死氣講句唔好意思逃走左。其實呢,我地唔會有生意都唔做㗎,但我地真係無你講嗰樣嘢嘛!

 

2)參觀博物館

我知我地舖個格局係幾似博物館嘅。我知我地間舖係幾有藝術氣息嘅。但有啲人入黎就真係當參觀博物館,greet完佢之後劈頭一句:「我睇下㗎咋。」okay無問題咁你靜靜地睇啦。弊在佢又唔係喎,睇睇下又問你「呢啲咩黎㗎」、「用咩物料做㗎」,答完佢問洗唔洗攞出黎俾佢試下,佢又話「我睇下㗎咋」。

先生,你知唔知出面博物館如果要真人導賞係要收錢㗎?

 

3)十問九唔應

我知有啲人好抗拒sales,覺得啲sales只係識不停氹人買嘢,唔砍到啲客一頸血都唔心息。但其實大部分sales都只係想meet target同等收工㗎咋。你入門口我同你greet,係公司規定㗎,問你需要啲咩,都係公司規定㗎!但有啲人一入舖就就開啟聖人模式,打坐入定,永遠十問九唔應,將世上一切誘惑都拒諸門外。

阿彌陀佛,你得道成佛啦,快啲去普渡眾生啦!

 

4)我不是google map

我知我個樣生得似receptionist嘛,但其實我無祕撈㗎,我好愛公司㗎!雖然我喺嗰個商場番工,但唔代表我知道曬全商場啲廁所喺邊㗎!

我地公司有間舖係pop up shop,位置開揚,超似商場服務台,所以每日都好多人問路,試過連續有幾個人問我廁所喺邊,我答到發火。又試過商場有間百貨公司搞購物日,啲人走黎問完第二個牌子係邊之後問用信用卡簽賬幾多錢之後先有得攞coupon。我心入面反曬白眼,但衣家保持笑容同佢講:「我地唔屬於後面間百貨公司㗎,不如你去問番佢地啦。」

更試過有啲人我地答佢唔知道之後話:「你梗係唔答啦,我無買嘢吖嘛!」

屌,你知就好啦。(講粗口是係sales文化之一,有機會同大家講下)

 

5) 休息為了走更遠的路

我知,你行完一日街好攰,好想搵個地方坐下,所以見到我地舖頭有櫈就情不自禁吖嘛。

試過有一個大陸阿嬸,一入黎就坐低左喺我地cashier前面張櫈度,然後話要睇耳環,咁我叫佢等等,擰轉身攞後面幾盤耳環俾佢睇啦。當我擰番過去嘅時候,赫然見到佢除左鞋喺度捽腳指!!!我當時真係呆左,然後好彩佢望左一眼就話「不用啦」走左,如果佢攞黎試,我地成盤耳環應該要攞去銷毀。

 

所以,如果大家去開行街shopping,見到啲sales笑容可掬咁同你講hello,你就做下好心回應下佢啦,佢地可能俾人當透明好耐㗎啦。(有時我地懷疑自己係咪返返下工死鬼左,所以無人見到我地)。不過如果遇著啲sales西曬面嘅,你就當時運高啦。

延伸閱讀:

良心sales手記——情人節風情畫

良心sales 手記