曾俊華係廿三條最佳推手

假圖

 

同女友傾開,點解香港人會真心鍾意曾俊華。我接受策略性支持,但對大家真心鍾意佢實在十分反感。

其實都係販賣希望,公關做得好。香港人有鋪癮,覺得可以單憑一個人就能夠令香港突然好似乜事都無發生過咁,回復歌舞昇平。

我難免係度諗,如果由曾俊華嚟推廿三條,會有咩效果。由佢嚟推廿三條,可能會比另一啲經濟民生上嘅「甜頭」大家,「抵銷」廿三條嘅負面效果。又或者大家會相信佢係一個「好人」。

「拿你睇下佢喺其他方面真係好為香港做得好好架」
「佢咁做都係中央逼佢啫,佢都唔想嘅」

如果想像一下真係立咗廿三條,就會發覺情形更加恐怖。廿三條一定係用嚟整頓港獨/本土勢力,咁香港人最叻就係blame the victim。

「你唔講咪無事囉你係都要講自己攞嚟衰」
「你睇下曾俊華『好好人』架佢一定係為香港好,係你班死廢青講咩港獨係度搞搞震」

沙盤推演一下就發覺,原來,喺香港,只要用出色嘅公關包裝成「好人」,就已經有充足嘅legitimacy去做一啲明顯違悖人民自由嘅嘢。「好人」散發出一種魔力,叫人對佢有盲目嘅信任同寬容,因為,「佢出發點都係好架嘛」(但又唔見有人會咁睇啲犧牲緊嘅抗爭者同學生架喎)。而呢種「好人」魔力,亦正正係最危險嘅嘢。今時今日,只要中共治港方針仍然繼續天朝思維,就算個特首真係好人真係真心為香港好,又有何用,天朝格局,中共意志當然凌駕特首意志。「好人」,甚至可以justify一啲嚴重侵害自由嘅政策同法例。

民主?其實大家都係買個希望,同埋買層樓啫。講出嚟認咗佢咪好囉,唔好係度呃鳩大家嘥大家時間啦。