【廢青日記】你愛你要講出嚟架嘛

 

(photo via cc Flickr user rushdi13)

 

我成日都話,如果你想要某樣野,你一定要講出嚟,唔好好似啲女朋友咁,明明想要又扮唔想要,然後期望對方會參透箇中玄機,「參透到就應份,參透唔到就嬲咗人」咁先得架嘛。

你心裡面實係話:「超,你個毒撚有咩資格講女朋友點點點呀?」但其實唔止女朋友,好多情況下好多人都係咁架,倒如老婆(如有)……講下姐,係陌生人咁做你先會嬲架姐,女朋友/老婆咁做又點會嬲呢?唔敢嬲,最多響心入面屌鳩佢幾次姐,屌者愛也呀。我講緊嘅係搭港鐵想你讓座但又唔出聲,認為你讓係應份、會自動自覺起身,然後你唔讓佢就單單打打發爛渣、想你無面拍你片果類人。唔止係搭車讓座,日常生活都好多時候係咁。

今日返屋企搭lift果時撞到個師奶,兩手拎住兩抽野。我入lift先嘅,我一入就禁咗自己果層,見佢入埋嚟就禁埋閂門。佢入到嚟就企咗響到唔郁,我諗應該係住同一層。但係諗諗下,唔係喎,我日日都差唔多時間出門口同返屋企,差唔多認得曬同層果啲人,好似一次都未見過呢個師奶。(包括對面個靚女學生妹,毒撚我好想同佢做……做朋友,但係為咗對方幸福,我唯有默默守護佢、目送佢。雖然最後佢都係「摺」咗一聲,可能我默默咁望住佢太耐。)我住30樓以上嘅,部lift上到十幾樓果時,個師奶失驚無神擰轉面撐大對眼望住我。

我咁高大威猛,廢青有為,唔係睇中我下話?我梗係當堂小鹿亂撞啦,直情鳩都縮埋添呀,大佬,恐怖片咩,無啦啦好似撞鬼咁啤到你恆一恆,粒聲唔出咁。我地四目交投良久,我嚇到自已同自己十指緊扣,然後部lift上到30樓果時,佢將手上果兩抽野放曬去一隻手,用吉出嚟果隻手去禁咗個制———31樓。

《師奶老江湖大戰純情小毒撚》大結局,原來係個師奶一路都等緊我幫佢禁lift,而我就錯過咗呢段孽緣。

原來響佢心裡面,一路都幻想緊一個陌生後生仔會主動好有禮貌咁問佢「幾樓呀公主殿下?」然後好標準咁除咗頂帽、左手按住右胸,微微欠身咁行個禮。作為毒撚自問都算識睇眉頭眼額,估唔到我咁都察覺唔到,一定最衰都係我啦。

呢啲心態同啲讓座撚根本完全一樣。佢地唔係仆街、佢地唔係欺壓後生仔,佢地只係容易受傷嘅王子公主,同埋唔識表達自己、比毒撚更毒撚嘅on9。大家千奇唔好歧視精神方面有問題嘅人,要包容下佢地。我地要悉心呵護佢地,等佢地健康快樂咁成長。只要我地忍住心痛無視佢地,等佢地學識向人地表達自己,唔好乜都當老奉,佢地先可以成為一個健全嘅大人。拖住個喼企埋你果到?唔好理佢。單打你「家下啲後生好自私」?唔好理佢。拍你片?整理下頭髮,執好個樣,挺起胸膛,比個微笑,個樣適合賣萌嘅可以講句:「咦唔係影相咩?傻咗添哈哈哈~☆」

所以大家記得,對住呢啲人唔好手軟。就算對住女朋友都係。如果你女朋友咁就嬲咗你甚至飛咗你,咁你就由佢啦,佢唔值得你愛。我會好好對佢架喇,你放心去啦。