今天保留清白之身、好過他朝被人千刀萬剮

曾俊華 FB 圖

 

特首選戰正式結束,結局亦毫不意外,林鄭將成為未來5年香港特首。對於這場馬騮戲其實我興趣不大,反倒是大家熱熱烈烈地捧到曾俊華上天,仲要人地話左推23條都有人話佢是「民主之父」,天呀我到底睇左D咩…

不少曾俊華支持者可能好唔開心,但其實我完全唔明唔開心D乜。當初林鄭被選委提名之時已經有580票,就已經明刀明槍話你聽「特首之位我志在必得」。雖然我覺得如果唔知真係好白癡,但事實係有數得計。選委得1200人,600就已當選到,當初已經有580票提名俾林鄭,仲有20票就等如當選,大家唔係真係咁天真以為曾俊華仲有機呀嘛?小圈子選舉既意思就係指,由選委提名到選委投票都係選委玩哂呀明無?暗咩票呢?D票由頭到尾都係睇上頭面色咋。好馬後炮,不過我真係覺得其實賽果好正常。

好啦,無得做特首,咁又點?當年唐梁之爭唐唐輸左,你估佢會周街乞食咩?2013年,唐獲中央委任為第十二屆全國政協常務委員,而董伯伯卸任之後都成為全國政協副主席,參與中美關係的外交事務,並成立了中美關係交流基金會,代表中國到美國演講。除左無靠山的曾要坐監之外,根據前人經驗,其實唔做特首(而本身同中央關係唔差既話),一定會有野撈唔使休。反而做特首,由於由始至終都係中央傀儡,施政點都係艱難(睇下有幾艱難既姐)。當年梁夠係高民望當選啦,睇下而家咩結局就知,日日都俾人吊老母。

民望呢樣野,其實學曾蔭權話齋,浮雲黎架咋。今日你公關做得好,他日你衰唔知乜,都可以由天堂跌落谷底;尤其是特首之位,根本就係動輒得咎、順得哥情一定失嫂意。但係如果你選唔到呢?由於未來如果唔使接呢個燙手山芋,變相少好多機會出錯,反而仲可以Keep住民望之下去評論對方施政、民望更加只升不跌。

最後,就好似民選港姐朱千雪咁,正正因為佢選唔到冠軍,大家先會登佢唔抵,更加支持佢。而家情況都係一樣,因為曾選唔到,大家就會更加登佢唔抵同更加支持佢。始勿論下屆佢會唔會選(下屆他已70歲了),對佢黎講,保留清白之身,對個人聲譽黎講都係百利無一害。所以,我覺得佢既支持者是真心要熱烈慶祝喎。

曾俊華在我眼中,都算係好人一個,我都唔想第日見到大家日日用粗口問候佢全家。今天你保留清白之身,好過他朝被人千刀萬剮呀。