城邦皇室秘密聚會:為香港建立海外根據地尋址覓地

話說林鄭以777票高票當選特首,香港再次進入「最黑暗的一天」,網上社運人士一片哀嚎之際,一向眾人皆醉我獨醒嘅城邦派反而雄心壯志,紛紛為新計劃盤算。
 

事緣國師陳雲尋日就出Post,話打算唔玩城邦論,改而在海外建立香港根據地,正當編輯部一眾紐倫堡之友食住花生睇爛尾,結果城邦派軍曹網友反應熱烈,為呢個二十一世紀驚天地泣鬼神嘅皇天上帝挪亞方舟計劃出謀獻策。
 

尋晚先有著名城邦派黑絲時事評論人李綺玲發表文章主張喺西澳洲實行海外建國,話因為英聯邦國家法系相近,而且有大不列癲帝國在背後主持大局,唔駛再睇中共面色做事。繼而昭明公主中出羊子亦於面書宣佈早有構想,位置卻係近年香港人紛紛移居嘅台灣嘅屏東縣南部,話果處緯度相近,氣候接近,而且一岸之隔就可以邪住香港嘅賣港賊,計劃又能帶起整個台灣南部起飛,好易同當地政府傾得成咁話。
 

更絕嘅係,小編明查暗訪之下今日仲發現一眾城邦皇室帶齊唔同地方嘅地理資料,喺旺角一間平民餐廳低調召開皇室大會,其中一位在席人士就係鼎鼎大名專為國師提供夢境作為決策參考嘅國舅爺楊偉業,小編仲發覺檯上面其中一張就係尋日昭明公主提過嘅台灣嘅地勢圖同人口密度、以至全年氣溫嘅資料,恐怕呢個鴻圖大計真係勢在必行喇。
 

國師帶同香港最精良嘅十五萬「熱普城」義人遠走高飛,留番個空殼喺處,新特首林鄭注定要孤守空城,今次真係喊都冇用。
 

文:中央專案組