薯片論選舉

曾俊華 FB 圖

 

其實真係唔知係咪特登整個777同365出黎,笑死小弟。其實講真,你同我講莊曾有機會贏我只會笑你無知,唔係話香港人甚至香港選委對佢支唔支持,係中央對佢既態度由始至終都冇變過——原來她不夠愛我,原來我做後備座。

講起薯片,大家都一定知道曾俊華點解會比人叫薯片叔叔:因為佢個樣同神髓都酷似品客 (Pringles) 薯片既商標;中間分界,嘴上二撇雞都一模一樣。但係我想講既係,曾俊華既待遇,同品客薯片都非常相似。

品客薯片1967年出現於市面,但係到2008年,品客薯片被英國高院裁定唔係「薯片」。咩話?品客薯片唔係薯片姐係點?英國政府就話因為產品得42%係馬鈴薯,加上食落唔似薯片,所以佢唔係薯片。曾俊華個故事其實好相似:莊曾1982年回流香港做公務員,一直係民望較高既建制派,但係就因為佢冇中央需要既某些特質,所以就算佢係建制老臣子都係狠狠地被叮走。

莊曾不夠硬朗。佢係一個會承擔既人,你話中央又何嘗會覺得佢適合?中央需要既係一個executer, 一個接order就一刀切既人,唔係要太極高手 (e.g. 831+23)。莊曾做唔做倒?做倒,但係佢會加多句「留意見唔一定要留鬚既」同你玩埋一份,做錯決定佢唔會夠林鄭厚顏,做好決定佢唔夠刷鞋,已經係死症。(姐係你求其亂入插港獨,西環求其搵個建制議員做都得啦)

莊曾過分圓滑。好多人覺得曾俊華個人講野柒撚懵懵食甜筒,但係如果你單計說話既靈巧性,莊曾完勝淋病,甚至同佢師傅煲呔曾有過之而無不及。唔好講特別例子,佢可以用一個建制身份,單用言語加上少少社交媒體就成功俘虜眾港人既心,就算佢講野有幾柒撚懵懵都好,已經顯示出佢人夠圓滑同識做人,呢點係689同777都冇既優點。但可惜呢個遊戲睇既唔係你有幾好食,係睇你有幾多馬鈴薯,所以就算你係米芝蓮三星令人垂涎欲滴既靚牛扒又點,都唔符合遊戲規則。更遑論佢一粒星都冇。

最後係曾俊華個樣唔夠似一個領袖。對唔住我都係一個睇樣做人既仆街,我呢句同佢個人能力係完全無關。屌,至少689都似一隻狼,講野夠中氣,加上佢個狠樣,就算佢係冇撚用,假若你係咩政治都唔知既擺佢出黎都唔係全無道理(雖然佢最終中央都係想佢講少句當幫個忙)。今次三個候選人冇一個presentable, 唯獨林鄭肯講曬所有中央想佢講既野(雖然會暗寸習總抬頭空空如也),政策上都講明曬中央想佢present既野,所以就算佢個格唔得,中央冇得揀既情況下都滿意佢。

香港同內地根本就係兩個截然不同既社會。香港係中國、英國、加上濃烈既殖民意識既一個畸胎,所謂獅子山精神要不屈不撓都係因為有個英國政府食住,香港人永遠有個「為人工作」既意識,先至會有一個同舟共濟,貌似香港人獨有既精神。但其實諗深一層,獅子山精神其實係殖民主義下既副產品。中國就係明刀明槍既一黨專制,佢要你A眼B眼同C眼都睇得出。你要明白既係,中國係有需要專政,因為冇專政既話,有十四億人既中國一定內亂到十年內收皮。但係要明白既係,香港上次被中國統治已經係王朝年代,要香港人接受中國今時今日既一套唔係話兩秒就你好我好大家好。777最終會唔會7出國際?大家拭目以待。

只能說莊曾係一個好政客,但係一個好政客唔代表一個適合既政客。等等先… 2009年,品客薯片被裁定要照舊繳交17.5%薯片增值稅,就只能希望莊曾唔會被秋後算帳啦(笑),唔講咁多,繼續食樂事薯片。