我眼中的香港經濟發展困局

 

(photo via cc Flickr user Ding Yuin Shan)

 

唔講政治。不如真係實務D,「為左香港好」,講下係我眼中香港經濟發展既困局吧。以下並無艱深經濟理論。一切都係按常理推斷。(係咁多人仲講緊777給她的意義果陣,呢D認真文,係預左無人睇)

 

1。房屋

人人都話房屋係問題。但係我眼中,房屋唔係問題,樓價高先係問題。但如前文多次提及,樓市作為港人認可既投資工具,就必然會好似股價一樣,有高有低。有人捱唔到貴樓既另一邊廂,有人靠佢發緊達。而地價亦係香港最主要收入來源之一,地價高昂,就係簡接稅,變相令薪俸稅同利得稅壓得好低。呢個就係香港經常標榜既「好有競爭力」既經濟環境。

要打破樓價高問題,其實政府無野可以做。增加供應真係無用呢。因為一,政府控制唔到人口流動;二,政府無政治能量去再玩移山填海;三,政府無辦法係呢個時候提及擴闊稅基;四,香港人會同你死過。認真。你問我,樓價一路升,政府可以做既,就係望天打卦,只要又黎多次金融風暴甚麼,樓價自然會應聲下挫。但到時困擾政府既,就唔再係買唔起樓,而係失業率高周低打爛飯碗既問題(即2003年老董因應腳痛下台囉)。

 

2。學新加坡

呢個真係唔係咩新鮮問題,亦都係各國經濟體面對既困局。香港有好多錢儲備,係可以唔再保守,大駛特駛,問題係有D問題如果錢就可以解決到,就唔係問題啦係咪?好喇,於是香港就成日心郁郁,想搞產業政策,唔好只係靠地搵食,想走高科技,想學新加坡,希望可以將個GDP追上去係咪?

鬍鬚曾話同香港人發左個夢。其實我都好認同,因為好多人香港人除左識炒股炒樓,好多都唔用腦。第一,你要搞產業政策,就要有年輕才俊幫你做膽,因為上一輩既人係呢個資訊世界,無人識做係咪?政府唔識做,好多舊舊地既大公司亦都只可以跟住做。好喇,你香港人有無人肯黎先?首先,政治因素已經令佢地卻步。再其次,香港亦唔夠人(個個都要做法律醫生呀嘛~)。好喇,其實依家先發現教育政策已經浪費左差唔多一個generation。

數一數,1997年出世既,依家都20歲,係可以出黎做野。但係佢地只可以繼續跟住玩炒股炒樓果種模式。個個都想講diversified economy,但無教育政策去配合,而家長風氣拜金至上讀X無錢途金句一出,問你點頂?結果人人被垃圾功課迫死,寧願跳樓。

自己無人,唔緊要,用銀彈搶人返黎,總有人唔理政治係乜,有錢就得既。OK架。但輸入人才,不論高技術定係低技術,就係外勞,呢個唔單係經濟問題,仲要係政治問題。又回到起點:政府有無足夠既政治能量,去好似新加坡咁叫成一百萬人非香港人黎做野呢?政府可唔可以突然走在填左個維港,將甲級寫字樓既租金降番低去吸引外資呢?又好似唔得。

經濟發展,最講「阿仆街」APK。A就係productivity,P就係capital,KULEI即係labour。科技你又無人做,人又無人等人口老化個個等全民退休補貼,咁得番capital accumulation。但你去到基建,無得搞,全部都唔係你想鍾意既野:

港珠澳大橋,高鐵,。。。全部都係要配合所謂國家發展所需。中港經濟融合係咩一回事,已經唔算係呢度既討論範圍。經濟問題往往其實到最後,都係政治問題,因為呢個係財富分配既問題。港資好少理,依家有高價,就賣貴屋俾你,賣貴商廈俾大陸人。有人接就得。你想玩本土,就等於有人想避開李嘉誠一樣,行果條都係水泥地,係佢間公司既,問你點搞。

 

3。港元

我地仲未講埋更加重要既一個問題,就係港幣既問題。

香港人發緊夢,除左去旅行,係唔會知咩係匯率風險。但又唔怪得晒我地,因為香港自198X,已經行左聯繫匯率。呢個亦都係差唔多係中國開始玩改革開放既時期。中國改革開放左3X年,聯繫匯率都有番咁上下長。但係美元同港元1對7。8,唔駛講都知人民幣已經完全唔同晒樣。

成日有講中國末日論。當然,佢死左,就梗係世界末日啦。但係香港五十年不變,亦都係走左接近一半。究竟以後美元,港元,同人民幣既長期關係係點(尤其是去到2026-36年),會係好耐人尋昧。之前任總就曾經係中大發表一篇文章,講始終都有一日要諗下聯繫匯率係點,即刻俾HKMA打沉。因為已經有market 即刻speculate 係咪有implications。香港,currency board 就真係金科玉律,掂都唔掂得。

根據impossible trinity,定左匯率,就無貨幣政策,而且經濟要透過物價調整。係美國經濟同香港經濟如果係一個中長期時間,SAY10-20年愈走愈遠,都未到2046,聯繫匯率只會對香港經濟愈黎愈不利,甚至大過佢想穩定匯價既好處。到時點?有無幻想過自己係香港買一層樓如果港元突然急跌20%咁點?你無幻想過,當然,你以為果日永遠唔會發生。係既,上一代就死左架啦,下一代,我就真係唔知喇(話唔定有WWIII呢!)。

屌,驚咩!依家香港仲有X千億儲備,X千億外匯基金。。。係香港人(甚至好多政客)都以為,好多$$呀,可以夠搣一世。稅又唔俾加,其他地方你就大花筒。捱到五年十年,但二三十年後亦一定出事(不妨諗下點解經濟體閒閒地都負債>100% OF GDP?)。洗晒D錢,真係唔靠中史打X你都唔得囉到時(又,人民銀行會唔會俾HKMA有實質貨幣政策權,俾你SET利率,玩印鈔呀拿?)。

 

結論:

新任CE話,政治問題太複雜喇,不如搞左D易D既先。老實講,我真係唔知佢講緊乜。民選政府有民意支持,都尚且要係左中右派不斷翻船仆街。我就唔知香港呢隻食鴉片生金蛋既雞,佢可以點樣搞喇。。。

政府當然有問題,但有D香港人無邏輯得黎,亦真係太仆街。。。自己玩死自己。所以依家現眼報係阿爸幫番仔買樓,將自己舊時呃番黎既錢嘔番落個仔度。你無有$阿爸阿媽送你去外國,有咩國際視野(+埋護照),你就真係,哈哈哈喇。