儲錢第一個目標:fuck you money

 

最近窮生教人由生活之中一D不良既消費開始落手戒掉,從而開始培養儲錢既習慣。我以先學習月儲$5000黎做標準,結果都引黎唔少批評。其中有好一部分人都異口同聲講左一個POINT就係:「儲黎有咩用?得果$5000,辛苦得黎一年得幾皮,十年都未夠買樓啦!」其實香港人係唔係中左拜樓教?一方面好討厭地產霸權,一方面開口埋口都係樓!樓!樓!口裡就不,身體卻很誠實!(詳見窮生舊文:你唔會做樓奴,點解你咁貼市?

窮生敢講,大部分香港人冇左儲錢既動力,都係因為樓!樓價狂升,人工根本追唔上升幅。而定一個上車盤就算借盡上會你都最少要有50萬先上到車。一個人出黎做野由年薪15萬左右開始,第一年儲到5萬,7萬10萬咁上。過住可以幾年都冇乜錢可以洗既情況,追一個唔知會唔會到既目的地,好多人都冇咁既意志。窮生作為窮L理財專家而家教你,覺目標太遠?我地SET近D,一步步黎!職場新鮮人第一個目標,先儲fuck you money!

有人可能唔知咩叫fuck you money,呢個係一個職場用語,姐係話人係要準備一筆錢係for當自己做左一份伏工,或者遇到仆街老細既時候,你可以any time同佢講一聲:「fuck you!」就唔做份工。窮生唔係鼓勵大家真係咁同個老細講,而係當你有能力可以短期內唔洗靠份糧都生活到,唔洗同自己講:「鬼叫你窮呀?頂硬上!」既時候,你工作既態度,心態同目光都比較遠,得到既野自然愈多!

 

咁一般fuck you money要幾多錢呢?

 

呢個人人都唔同,要睇返你既生活情況,供緊樓?已婚?有冇子女?好多唔同既原因都會影響你要儲幾金額,一般黎講如果只係轉一轉工,我會建議大家先學儲左自己6個月既生活費。為左比較具體同埋多數都係後生仔女睇,我就假設大家都係廿中既新鮮人。首先你既月入我當你係15k,一個月比3k~4k家用,家用不可以停,呢度大約20k。生活費會因為你冇野做而少左既,而且都應該減少高消費既活動,除非你想去下旅行。如果係,咁你仲要額外計一計旅費要幾多,on top再加上去。生活費盡量做到3k以下,果度又係20k。再加埋係冇野做果排窮生會建議你定好哂時間表,揀1-2樣新野黎學下,預多10k做呢件事,姐係話!你基本既fuck you money要係50k左右。

用簡單生活換生活自主,,其實相當值得。當有人質疑窮生,為左儲錢又要戒煙戒咖啡!又唔可以飛的!一星期洗一千幾百同朋友食豪d又唔得!咁既人生邊有樂趣?窮生就會話你聽,如果一個人要靠做呢d野先叫有人生樂趣,呢個人既人生本身已經好冇趣。當你能夠好好掌握自己生活既話事權,真切地問自己到底想過d咩生活既時候,就係你人生成功既開始,而做到呢件事其實唔係好難,當你好似窮生咁,愛簡單,喜歡享受自然同慢活。反而你會覺得以前果d所謂享受,係燃燒緊自己既生命同青春。日日返工做到仆街一日先得一千幾百,一個星期玩2—3個鐘貨仔就燒左去,你真係覺得值得?