【實戰教學長文】跟我去倫敦 West End 煲音樂劇!

 

倫敦城西(West End)同紐約百老匯 (Broadway)係世上兩大 theatre 勝地,West End 更加有 Theatreland 之稱。如果你有幸到訪英倫,何不騰出一晚睇場 show,感受一下 live theatre 嘅魔力?更何況英鎊低迷,此時不睇更待何時?唔好以為睇音樂劇係中產活動,要 dress up 到衣香鬢影咁款,其實成件事可以好 casual 好老少咸宜,最重要係好 fun!睇完隨時迷上,好似我咁返唔到轉頭㗎!

(因為我本人係 musical 迷,所以本文介紹 musical 為主,不過多數貼士一樣可應用喺睇 play 度。)

 

【乜嘢係 Musical?】

“Musical" 其實係 musical theatre 簡稱,即係音樂劇啦,係一種結合歌曲丶劇情丶對白同舞蹈嘅舞台表演,有時亦都聽到有人稱之為歌舞劇,例如 《West Side Story》可以叫音樂劇亦可以叫歌舞劇。不過未必全部 musicals 都會歌舞連場,例如 《Les Misérables》以唱演為主絕少舞蹈,就好難稱得上歌「舞」劇喇。

音樂劇以歌曲推進劇情,角色講講下嘢會無端端唱歌,有啲 sung-through musicals更誇張,對白全部係唱出嚟,由頭唱到尾(如《Les Mis》),如果你呢樣嘢都接受唔到就可以唔使再睇本文喇 bye~(唔係講笑,真係有人投訴 “There’s too much singing!" 㗎!)

 

【Musical vs Opera】

有人會問:歌劇 opera 同音樂劇 musical 係咪同一樣嘢?成日都有人話我又去倫敦睇歌劇,其實我無囉!

歌劇係一種比較傳統(所以感覺「上等人」啲)嘅表演藝術,係西方古典音樂傳統一部份,而音樂劇就係喺十九世紀先興起嘅大眾娛樂。Opera 以表現音樂同歌者的歌喉為主,劇情同演技為次要,因此 opera 嘅表演者叫 singers,歌喉最緊要;但係 musical 嘅表演者多數叫 actors,要做戲唱歌跳舞周身刀張張利,而 musical 中歌曲亦係為故事、人物感情服務。《Phantom of the Opera》雖然個名有 opera 呢個字,事實上佢係一齣劇情關於 opera 嘅 musical,唔好撈亂呀!我未試過著晚禮服去睇《Phantom》㗎!

(另外又有一樣嘢叫 “operetta",意思大概係比較 light 嘅 opera,但係佢同 opera 同 musical 嘅界線頗模糊,例如《Candide》多數被歸類為 operetta,不過亦經常被當成 musical,我睇完亦都唔係好分到佢同 musical 有乜分別 so sad。)

 

【睇乜好?】

講咗咁耐終於入正題。好喇你決定喺倫敦睇 show 喇,咁睇邊齣好呢?

如果只係有時間或者 budget 睇一場,理所當然會揀一齣大路經典。《Les Misérables》丶《Phantom of the Opera》丶《Wicked》丶《Lion King》丶《Mamma Mia》等都係長做長有嘅大路 favourites,各有賣點。《Les Mis》同《Phantom》係真正經典,屹立 West End 超過三十年仍然歷久常新自有其原因,兩齣我都睇過好多次,每次都會重新被感動,抵佢哋咁賺錢。不過溫馨提示,如果怕跟唔到劇情或者明唔哂啲英文,最好睇 show 前 Google 一下故事大綱了解下(或者睇下電影版?),始終 live show 無字幕,做定少少功課咁就唔會太朦查查啦。

此外個人覺得《Wicked》幾易入口,劇情唔會太沉重,歌曲易上口,production design 夠哂 impressive,故事又勵志又歌頌友誼,可謂老少咸宜,特別女仔應該都會鍾意睇,我介紹親去睇嘅朋友都讚不絕口。

《Lion King》丶《Aladdin》呢類 Disney musicals 好處係你應該已經知道劇情,唔怕太迷失,而且保證 family-friendly;《Mamma Mia》丶《Thriller》之類的 jukebox musical 係用現成嘅流行曲直接入劇,就算唔知故事做緊乜都起碼可以當係金曲之夜咁睇,聽下啲耳熟能詳嘅歌都可以值回票價。

當然,如果有時間(又有金錢),不妨欣賞下啲唔同種類嘅 show,上網睇下 review 就無咁容易中伏啦。細啲規模甚至 Off-West End 嘅小製作都時有佳作,好多時啲飛仲平啲𠻹!好似2016年我睇過最精彩嘅倫敦新 show 就唔係期待已久嘅迪迪尼鉅獻《Aladdin》,而係喺得二百幾個位嘅細劇場 Charing Cross Theatre 上演嘅《Titanic》。

 

【點買飛?】

最簡單直接係上你想睇嘅 show 嘅官方網站直接正價購票,通常可以睇到座位表,知道自己買嘅飛係坐邊度。Delivery 方面可以揀 box office collection,到時開場前45分鐘左右起就可以去該劇院票房攞飛,記得帶埋買飛時用嘅信用卡,有啲員工真係會 check,不過好多時都係問你姓名就俾飛你。有啲 show 亦都有 print-at-home ticket 嘅選項,可以喺屋企印定張飛留俾關羽⋯⋯呀唔係,印定張飛到時直接出示入場就得。

當然可以直接去劇院票房購票,仲可以慳返一兩鎊 booking fee 𠻹。好多劇院有 day seats 賣,即係 hold 住少量前排坐位,當日朝早喺票房以平價發售,不過欲免向隅就要早啲去排隊喇。

另外有個新 app 叫 “TodayTix",直接買飛都幾方便,而且保證不賣 restricted view 飛(即係有樑柱欄杆遮住你視線呀之類),買完飛又係開場前直接去票房拎飛,快靚正,不過個 app 每張飛會收 £3 手續費。特別推薦呢個 app 某啲 show 有 lottery tickets,如果參加又被抽中就可以用 £20 買靚飛,另外又有 rush tickets,可以俾 £20 買當日場次嘅 last minute 飛。

如果你係當日或早一兩日突然心血來潮想睇 show,可以去位於 Leicester Square 嘅 TKTS booth 睇下,佢係零零舍舍喺個公園入面有個大嘅石屎亭咁樣,官方認可保證真飛唔呃人,提供 last minute 折扣平飛,好多時有 20-50% 折,甚至更多,我啱啱就喺開場前一個幾鐘用 £55 買到 face value(原價)值 £149 嘅《Jersey Boys》靚飛。所有 available 嘅飛同折扣都登哂喺個亭嘅熒幕上,如有疑問或者想有人推介好 show 可以問售票處哥哥姐姐,亦可以事先上 tkts.co.uk 睇吓嚟緊兩三日 what’s on sale,不過買飛一定要親身到個亭,個網有得睇無得買。而且喺 TKTS booth 買飛無得揀位,只係知道張飛 face value 幾錢同位於觀眾席邊一 part。

至於喺 Soho 區通街都係嘅疑似呃遊客 discount tickets 街舖,基本上信不信由你,我試過喺 TKTS 買唔到某 show 嘅飛而 last last last minute 喺某附近舖頭仔買到,最後亦成功入場,但亦聽講過有遊客中招俾咗好多錢買山頂垃圾位。真正獲授權嘅 ticket sellers 會有 “STAR logo"(Secure Tickets from Authorised Retailers),大家可以留意返。

我自己習慣買飛前上 http://www.theatremonkey.com/CURRENTSPECIALOFFERS.htm 睇睇最近有乜 show 有 special offers,有時真係會執到抵飛㗎。

每年一二月間算係 theatre 淡季,到時去 http://www.getintolondontheatre.co.uk 就大把熱門 show 大減價,£10 £20 £30 £40 都有,勿失良機!

有一點要留意,West End 嘅 show 一般一星期八場,平日每晚一場 evening show(多數 7:30 pm),週中同週末(多數週三或週四加週六)各多一場日場(matinee,多數 2:30 pm),週日休息。不過亦有一啲 show schedule 唔同,例如唔休星期日或者 matinee 開場時間唔同,計劃行程時要注意呀。

 

【點揀位?】

揀位真係一門學問,而且每人都有不同偏好,以下只係一啲 general guidelines。一般而言倫敦較大型劇院嘅觀眾席分三至四層,喺正台下「地下」嗰層叫 Stalls(喺 Broadway 係叫 Orchestra),上一層叫 Dress Circle 或者 Royal Circle,頂價貴飛靚位都係喺哂呢兩 part。再高一層叫 Upper Circle 或 Grand Circle,個名好 grand 咁,但個位嘅 view 已經唔 grand,算係山頂位,若果再有高一層就係 Balcony,同個舞台無雷公咁遠,好容易睇到瞓著。有啲 show 直情設有企位喺個院最後方,平就係平,不過 en 唔 enjoy 就要試過先知。

如果有錢自然可以任性買一百幾鎊嘅 Stalls/Dress Circle 正中間 premium seats,不過其實呢啲天價位前後左右附近嘅位個 view 一樣唔錯,而且價錢平一截,可能平成一半咁滯!如果你想認真投入享受睇 show,呢啲原價大約 £70-80 嘅飛係首選。咁 Stalls 好定係 Dress Circle 好?Stalls 最接近舞台,睇演員嘅表情一清二楚好易入戲,氣氛一流,但係如果坐得太近台可能唔係好睇得清楚成個台嘅佈局,去到大型 set piece 歌舞時又好似睇得無咁爽。Dress Circle 啱啱相反,無咁近台但可以一眼關七睇哂成個 stage。總之各有各好,兩 part 都唔錯。

如果 budget 有限,可以考慮 Stalls 或者 Dress Circle 較後排或側邊平啲嘅位,又或者 Upper Circle 前排,價錢可能大約 £40-50,都睇得下,個 view 一般唔會太差。去到 Upper Circle 以上就真係山高舞台遠,個 theatre 唔算大的話還可以,如果係大場就真係連人樣都唔多睇到,加上 jet lag 會好易瞓著,不過勝在平,正價廿幾甚至十幾鎊都有交易。

不過買飛時要留意返,有啲位標明係 restricted view 視線會受遮擋,或者有時睇唔到成個舞台。有啲 theatres (例如《Phantom of the Opera》嘅 Her Majesty’s Theatre)坐位設有£1 望遠鏡可供租用,咁就算山頂位都叫做可以見到演員個樣。

 

【開場!】

講咗咁多,終於到 show night (or day)!著到靚靚(optional,牛記笠記街坊裝亦得,不過難得睇 show 喎何不乘機打扮下),喺 Soho 附近食飽飯,最好早半個鐘左右到 theatre,要攞飛就去 box office,之後開開心心入場去!

門口一般有 staff 輕輕地 check 下你個袋,入咗大堂我會首先搵 cast list,有啲 theatre 係有塊版列出當日演出者名單,有啲就高科技啲用個 mon,我習慣影低 cast list 作參考同留念。之後就會去望下啲紀念品睇下吸唔吸引,考慮買本場刊(programme 大約 £4 本,有劇情歌曲簡介丶演員名單履歷等)甚至 souvenir brochure (即係大大本多高清劇照嘅紀念圖冊,約 £5-6 本)。係呀倫敦睇 show 場刊係要俾錢買㗎,唔似紐約 Broadway 入場有人派免費 playbill,不過計埋本場刊 in my opinion 都係 West End 抵睇啲,呵呵。

喺入席坐低前除咗可以喺 bar 度飲返杯(或者 order 定中場休息 drink 都得㗎)丶買包糖仔食,最緊要係去廁所先!West End 唔少 theatres 有返咁上下歷史,裝潢精緻典雅但係廁所唔係好夠,隨時排長龍,而且繁忙時間,特別係中場休息 intermission 時仲可能唔係好冲到廁⋯⋯開場前提早去定廁所就可以安心睇 show 啦。

去完廁所,埋位坐低,嘩,個場係咪好靚呢?不過要留意,有啲場地唔俾影相㗎!Now sit back, relax and enjoy the show! 記住熄電話或者較 silent mode 呀,唔好影衰自己,基本 manners 一定要有,你懂的。仲有,yes, they’re singing live,唔係咪咀㗎,唔知點解成日有人咁問我⋯⋯

 

【完場】

Act 1,intermission,Act 2,歡樂時光過得特別快,兩個幾鐘好快過,希望你睇得開心值回票價啦!如果真心覺得演出非常精彩,不妨喺謝幕 curtain call 時起立鼓掌,standing ovation 對演員嚟講係好大嘅鼓勵同肯定。

散場後除咗可以同大家一齊迫 Tube 或者巴士返歸之外,有時我會行去 theatre 嘅後門 stage door 同演員傾下計集下郵(演員放工通常經呢度離開,stage door 門口會寫明 “_______ Theatre Stage Door" )。佢哋多數非常平易近人,簽名 selfie 有求必應好鬼 sweet,我亦都有做過小 fans 專程送嘢食嘢飲小禮物,同某啲演員 friend friend 哋,之後佢哋都會認得我同我 say hi。不過當然要有禮貌地 approach 人哋,如果人哋趕時間走你就唔好阻住人啦,有啲演員真係一完場就要趕火車極速閃人,你阻人收工死後可能要 BBQ spring pockets 㗎。仲有某啲出名嘅演員為免混亂直情唔會响 stage door 出現𠻹,fans 白等一場都唔出奇。不過如果好彩的話,可以攞住本親筆簽名場刊加 selfies 返屋企(或酒店)慢慢 J,咁就真係 a perfect night out 喇。鍾意嘅話仲可以上 Twitter follow 埋你嘅飛佛 BB,再讚多人哋幾句,不過唔好太瘋狂,變 stalker 就無謂啦。

希望呢篇長文幫到你,最好令香港有更多 musical fans,大家好 show 齊齊 J~