好心你哋班宅男就唔好葡萄謝霆鋒啦!

 

我睇左佢做鋒味段片,同埋網友反應,我就明白人地點樣成功喇。

試諗下,一個人唱歌出身,單線solo 獨步天下,突然北上,成為公司老闆(應改稱ML鋒),腰纏萬貫之後,竟然突然唔理旁人批評,自己打造自己成為新一代國產Gordon Ramsay 既廚神形象,呢種成和敗努力嘗試既態度,係幾咁令人欽敬莫名。

我地姑勿論佢係完全copy 左Gordon 既成名菜式,再煮一次就話自己招牌菜了。呢種所謂批評,其實係十分膚淺。向來係強國標準,呢種唔能夠說抄(料。。。料理人的事,能算抄麼?),呢種叫做推陳出新,師夷長技以制夷,係合符國策的。除左呢樣野之外,仲有三點,係好值得一談:

1,ML鋒竟然可以係本來個煎PAN無任何野係上面既情況下,鏡頭一轉,就多左個食物係上面。呢個有人話係魔術,我絕對唔能夠贊同,呢個根本就係耶穌係接近2000年後五餅二魚神跡之後既進化版。從無到有,亦都打破左物質守恆定律。咁樣既入廚方式,是前無古人,後無來者的,分子料理更進一級,就係量子料理。

2,ML鋒搞完一大輪煮好佢自己版本既牛肉之後,佢有一個用鋸齒刀配合磨刀石磨刀既動作,其手法既青澀同生疏感,好明顯係有心扮出黎,掩飾佢自己一早廚術已經溝集中西,達到百鍊自得既境界。當然CHOK住黎磨把有鋸齒既刀,係有助提高收視架啦。至於把刀之後係咪崩左一忽,不在考慮範圍內。

3。有網友眼利,指出左舊肉係被切落去之前,已經中間出現一度完整既切口。呢種當然不可能係造假。試問普天之下,點會有咁無聊既造假呢?等於我亦有理由相信,選委係憑住良心投下神聖一票支持奶媽,中X辦係完全七盡己任,無進行任何形式既干預的。特首選舉係公平公正公開的。切左再合埋,實在太睇少ML鋒。咁低莊既野,有辱佢量子廚神之名。

未切而先出現刀痕,顯示到刀功已經係超凡入勝既境界。更加佐證到之前既磨刀,只係fan-service,同廚技無關。其實就算拎住既係一支木棍,可以完整切開烤肉,我亦會深信不疑。我衷心希望,ML鋒下一步,應該係時候去參加Master Chef明星版,最後可以同Gordon 同場較技。相信有機會改寫整個米芝蓮評級系統--

到時整個米芝蓮五星旗,掛係自己開既餐廳上面,真係光忠耀祖,壯大我國幾千年民族,意志為之抬頭呀。