謝霆鋒放棄咗結他揸鑊鏟,真係香港音樂界嘅損失

 

話說,香港曾經出過一位風靡一時,重同樂壇天后喺埋一齊嘅年青後進,而家你數埋啲咩陳柏宇、周柏豪、重有啲乜鬼靚仔韓星,完全唔係佢嗰皮。佢靚仔,在於有良好嘅家族遺傳。佢型,在於有態度,一種桀驁不馴嘅態度。

你試諗下邊個可以將《無聲彷有聲》演繹得如斯完美?一個冇插線嘅結他,竟然可以發出繞樑三日嘅美好音色;一個以結他為左右手嘅歌手,可以喺台上面當眾掟爛自己部結他。呢種咪就係型,呢種咪就係態度。

只不過佢嘅事業,並唔係一帆風順。你記得嗎?「他,知道哭是沒有用的。」一個十七歲嘅少年,拍戲受傷,竟然同醫生講,冇關係,我自己縫針,哇!勁過關雲長刮骨療傷啦!喂,就算係虛構嘅,都足以印證佢嘅人氣係幾咁高漲,近嚟重要日食兩排止痛藥,今次真係冇嘗試過嘅人生,佢都想嘗試下。

唱歌、拍戲,佢已經試過太多,所以佢試埋撞車,試埋頂包,人生經歷越豐富,就越有佬味呀嘛。反正出返嚟社會,又係一條好漢,更何況,佢原本就係一個熱血男兒呢?於是佢繼續喺幕前演出,兼且開後製公司,打骰做老闆。正正因為佢敢,佢試,所以佢有得揀自己條路,佢就係老闆,而老闆要負嘅,就唔只自己嘅責任,更要負上員工、員工家庭嘅責任。

所以,佢決定捨棄自己嘅母語廣東話,北上操普通話兼揸鑊鏟。精巧嘅刀工,喺舊威靈頓牛已經切開嘅同時補上無形嘅切割,最後磨刀霍霍加上鐵粉幫你補充鈣質鐵質;厚切魚生係為咗刺身可以充滿成個口腔,令你啖啖鮮味。甚至,將雞蛋仔呢啲街頭小食變成可以上得碟盤嘅精巧菜式,真係世上只有佢一人有做世界級大廚嘅天份。

不過相對睇佢煮嘢食做住家男人,散發佢嘅鋒味,我真係寧願繼續睇佢喺台上面散發佢嘅鋒魅。你睇下每年幾多粉絲,問佢幾時出返嚟開演唱會?不過佢連喺演唱會做嘉賓都要煮嘢食,就知佢對烹飪幾有熱誠。

唉,佢放棄咗結他揸鑊鏟,真係香港音樂界嘅損失。

佢的名字,叫謝霆鋒。