美容

 

語言係有力量嘅。一般嚟講,我哋會覺得「整容」暫時都仲係一個好「強烈色彩」嘅字,會畀人聯想係好大工程,好大改變,或者好高風險咁,總之係啲大件頭嘅嘢。所以近年開始好多好特別嘅講法,例如叫「醫學美容」,或者直接描述個做法,好似打 Botox 咁。

我諗打 Botox 喺今時今日真係幾乎唔當係「整容」,只當係一種好似 facial 嘅嘢咁。咁你 facial 都會拎舊唔知鐵波定乜鬼喺你塊面到碌碌下,間唔中又電下你,然後就話你知你塊面又靚咗(「又」字係重點),咁啦。

我無意批判啲人整容,或者打 Botox ,咩都好,因為而家呢啲就好似基因改造食物咁,係偉大嘅科學帶畀人類質的飛躍,乜乜物物,你批評佢就係反科學反人類咁滯。

最近睇到有人介紹(應該有收錢)打 Botox ,話可以瘦面,就係去美容院打支針咁,好快,四個字搞掂, Lunchtime 去打針然後照返工都仲得。又講到間美容院幾靚幾靚咁,我覺得成件事其實好虛妄。

你話我守舊都好,打針落皮層下,打入身體內,呢啲嘢始終好有戒心。就算你唔講啲泥古中文嘢咩身體髮膚不敢毀傷都好,其實唔擔心會感染嘅咩?早兩年果單美容院敗血症恐怖事件都仲記憶猶新呀。係我知,性質唔同嘛,打 Botox 好多大藥廠出,好安全乜乜物物嘛。

我不期然諗起啲叫雞嘅男人。咁其實戴晒套咁叫雞扑嘢,都好安全㗎喎,點解女人會覺得男人咁做係好污糟?只因為你美容院門面靚啲就代表乾淨安全放心?喂咁個妓女都好靚好白淨好乾淨㗎喎。而如果個男人(你可以叫佢雞蟲嘅,反正世界上無男權份子屌你歧視)係戴套叫雞的話,其實技術上真係仲乾淨過你打針打啲「肉毒桿菌的毒素」入皮下㗎喎!

最搞笑係,打完 Botox 之後,果篇文章貼咗張「對比照」,話即時塊面瘦咗。割肉咩。佢張事後圖係高抄嘅,一開始張事前圖就係水平影過去,喂好似高抄的話就算有三個下巴都可以減走一兩個㗎喎。

咁講真,搵食啫,犯法呀,世界上大把嘢唔認同啦,啲人都係照做,我哋都係照樣得個睇字講字,我唔係反對人打 Botox 呀,只係覺得其實講到「效用」,好多時係心理效用大過實際效用咁解。