以前香港最信得過嘅銀行,服務幾時開始變成咁?!

 

(photo via cc Flickr user Just some dust)

 

兩日寫既日記。係電台講完一次之後,有個聽眾,寫左一封好長,好多粗口既信畀我,話我唔好亂作故仔。

結果,我講完之後,原來有好多人都收到過咁樣既信。有一個朋友係新加坡,直頭寫信投訴到高層,問究竟獅子銀行點解要咁樣用電話服務,你證實到個客,但個客證實唔到你,點解我要咁做?

到今日,都冇人畀到答案我。

 


 

二十年前,如果你係香港,係屋企收到個電話,係銀行打畀你,叫你畀身份證號碼畀佢,你會唔會畀佢?

有一日,有一封自稱係某某銀行既信,去左我屋企。佢話叫我要更新一D個人資料。你知啦,呢排咁多騙案,又有咁多「社會實驗」,我點知有冇人用CAM拍緊我呀。所以,我就冇理佢啦。點知過左兩日,又有一個自稱係銀行職員既短訊,去左我手機,話我要更新個人資料。我見佢咁煩,就打去問下啦。點知,一聽既係一個講廣東話唔正既接線生。

之後,我問佢:請問你點證明,你係獅子銀行既人?你有咩證據,可以用電話話畀我知,你係獅子銀行既人呢?

個女仔就答我:先生,其實你可以去分行,不過佢都係打返上黎架咋。

哈哈哈哈,好啦,我唯有將我既個人資料講晒畀個女仔知,之後個女仔就話,

先生,我明白架啦。你需要去分行簽返個名,因為你有呢樣,呢樣同呢樣資料呢,係有唔同左既。需要更新。

係呢個時候,我火都黎埋,我想同個女仔講:

小姐,你而家係想點呢?我將所有野講晒畀你聽,原來你at the end 你要我去返分行,點解唔叫我係分行一次過做?你要核實我身份,點解我唔使核實你身份呢?點解獅子銀行而家咁既呢?我到今日都唔明,我做錯咩,點解我要畀你玩成半個鐘呢?

但我深呼吸左一下,之後吞返晒所有說話。因為,我知道呢個女仔,有可能睇晒我所有財政狀況同埋個人資料。我深呼吸左一下,之後我就唯有同佢講,好呀,唔該晒。

你地話,如果你係我,我可以點做?

本來,我都唔係真係好嬲。只不過,去到分行,原來,分行既職員,佢都係需要打返上客服中心,即係call center ,搵返果個同我講野,而廣東話講得唔正既人,之後先至同我準備張form。簡單D黎講,原來櫃位既人check機,係唔知發生咩事,之後佢都要打返上call center,問返果個女仔,先再同我準備張form畀我簽名。

咁我打去call center 做咩呢?

點解要浪費我半個鐘呢?

到今日,我都唔明。點解獅子銀行要做呢樣野。究竟佢可以慳左幾多時間,而同時又浪費左個客幾多時間呢?

我係櫃位,等左半個鐘,周圍排隊做銀行野既人,唔係講國語就係講唔正廣東話既。有D直頭只係拎張港澳通行證就去開戶畀人彈返轉頭。又有人開本票係買保險基金。究竟而家每一日銀行用幾多時間畀人走資呢?

好記得,好多年前睇過美國作家 Bill Bryson 為英國報紙寫既專欄,佢話係機場見到好多自動化既入閘機,有好多本來係由航空公司既人做既事,變左由我地做。咁點解航空公司冇減返價既呢?好啦,而家我地D銀行服務,好似越黎越先進,話咩都要Paperless 要環保,萬一有一日有咩事,銀行將D數字玩玩下玩到冇晒,唔見左,咁我可以用咩做證據追究返銀行?一個電腦file嗎?有邊個會可憐我呢?

我唔知。呢個世界,好多價值,好似冇得質疑咁。好似環保。唔收銀行紙既月結單,好似係好環保。但係,我到而家,我都係收紙既。因為,我唔信科技,我唔信人。係,我唔信人。唔好同我講信任。係我人生走到今日,同我講想要我「信任」既人,十居其九係呃我,剩低果一個都係想我幫佢手做野而已。

信任?我活係2017年既香港,面對大機構,大組織,我連基本保護自己既憑證我都得唔到,點解呢個世界有D人會走去信一D劣績斑斑既人做政工作者既呢?