讀書,其實為乜先?

 

(photo via cc Flickr user Francisco Osorio)

 

一般嚟講都係分成兩個理由:興趣同搵錢。當然有啲奇人可能會覺得讀某啲科特別型或者「高級啲」啦,例如本毒撚我就見過一個讀歷史嘅肥仔話「歷史係高級啲嘅知識,高級過自然科學」,我當堂笑到收唔到聲。果堂係UG堂,係讀chem嘅。

唔計呢啲小眾,我諗大部份人入大學揀科果時,都係響興趣同搵錢兩者之間掙扎。一邊係高呼「我要做金融才俊!」然後狗衝去讀商科<刪除線>最後做咗sales仔</刪除線>;另一邊就好瀟灑咁拋低一句「我唔在乎錢,我心在學術志在興趣架炸!」然後毅然讀咗文學院理學院,<刪除線>最後真係乞食</刪除線>。

早排中大新傳搞咗個(自稱)社會實驗,辣罄咗好多人,一眾跟車太貼嘅人表示「神科又點呀」,令到讀晒銀時(Science)嘅本毒撚又諗起所謂「讀書為興趣」。利申下先,本毒撚讀果科出咗名又難入但又乞食,呢幾年見過唔少同輩同師兄師弟際遇,自己都諗咗唔少野,應該有資格講返兩句。
做學問,其實同拍拖差唔多。

首先,老實講,大部份人響入大學之前,甚至讀PhD開始做研究之前,其實都對果科差唔多零認識。你話你由入大學之前睇咗好多相關嘅書?好多人都咁講,但好多時果啲都係皮毛,更加唔好講有啲人直情睇都無睇。到底某一科讀啲乜野,響未真係讀之前,其實好少人有準確嘅認識。更甚者,有啲人諗住中學數學好所以大學就讀數學系,呢單真係莎士脾罅五大悲劇之首。

就算真係入咗大學開始讀書,初初學可能覺得「哇,啲理論好型呀!Mechanics 好好玩呀!」或者「哇呢條定理真係好powerful呀,prove到好多野呀!」,但係學得耐,你就會發現當初覺得好撚完美果啲理論,就好似你條女咁,對得耐咗,先現其實都幾多缺點,有時仲有啲on9添。

另外,喂,如果你讀到一pat屎咁,你係咪仲可以好似當年考完DSE咁用燦爛嘅笑容話「我為興趣乜都得架」先?尤其是你見住隔離讀BBA個中學同學,以前渣過你,但係家下就輕鬆過三,而你就讀到隻狗咁都差少少先過到,你開唔開心得落先?喇,得罪講句,人呢,通常會多少誤以為自己做得好嘅野就係中意做嘅野架。梗係啦,做完會因為做得好而比人讚喎,威喎,英雄主義喎,乜乜科揸fit人喎,實開心架,人之常情嚟姐。於是乎好多人就將呢種開心錯誤歸因,以為自己係中意做果樣野,好似吊橋效應咁,「哇,我望住個女仔果時心跳好快呀,佢一定係我真命天女喇。」然後第日就知死。

仲有呀,大家十八廿二,個人無論身心都仲發展得好快。興趣呢家野,真係會變都唔定架,連中意邊類型女仔都會變啦下嘛。唔一定係會對讀緊果科失去興趣,但係好有可能會多咗好多其他興趣,當你唔係學霸,唔可以輕鬆搞掂學業去做其他野,甚至差唔多成副精神放曬落去先應付到,你好自然會動搖:「呢樣又係興趣,果樣又係興趣,到底值唔值得為咗一棵樹放棄成個森林?」甚至乎,當初話「我唔care入少林寺無女溝!」果啲,到咗咁上下年紀,係咪仲可以堅持到?本毒撚識得啲朋友(係呀,毒撚都有朋友架。),由唔睇AV(佢果時高中)、連女仔一開始有塊膜都唔知,變到餓狼咁款、無蝦條不歡呀大佬。

做學問真係好似拍拖咁,初初為之著迷,後來先發現伴侶嘅缺點,甚至可能搵到另一個真命天子都未定。

真係架,風水佬呃你十年八年,本毒撚用做咗廿幾年魔法師儲埋嘅魔力擔保,真係無老點各位。

同埋,讀undergrad係一個故事,讀MPhil、PhD又係另一個故事,千奇千奇千奇唔好抱住「我第日一定會拎諾貝爾獎」呢啲三四層樓咁高嘅夢想去讀書呀。讀MPhil、PhD嘅野,有機會先再同大家講。