海外建國運動維港揭幕 陳雲示範摩西過紅海 多人遇溺

早前雄心勃勃聲稱要搞海外建國運動嘅敗選國師陳雲,趁今日愚人佳節喺尖沙咀海發傍起啟動儀式,首次透露計劃經已選址瓦努阿图,貪佢話晒都叫做大家想住嘅地方。

儀式開始,國師振臂一呼「海外建國正式啟動!」全城呼應,隨即話要即場示範摩西過紅海,以示帶領港人走出厄困嘅決心。國師帶領一眾城邦皇室喺祭壇念念有詞,祈求皇天上帝賜予力量,維港果然分成兩邊直通灣仔,萬五名「熱普城」義人急不及待投奔怒海,開始歷史上第一次嘅行路橫渡維港。

可惜途中唔知係因為法力不足定係同皇天上帝之間訊號不良,尚未有一人抵達對岸之際海水就已經還原,一心奔向礦野嘅埃及子民慘變法老大軍,多人遇溺。

消防署接報後連同飛行服務隊出動多艘大型消防船同直升機搜救。一早準備好水泡游番上岸嘅國師就向記者解釋指自己同皇天上帝一向好有默契,是次意外係受到雷動計劃干擾,話會追究責任,對賣港賊處以皇天擊殺。

警方發言人指是次活動未有於申請不反對通知書過程知會會有「摩西過紅海」,譴責主辦單位臨時加插高危活動是不負責任舉動,更涉嫌未有購買第三者保險之餘沒有安排足夠水泡和後備巫師,案件已交由律政師跟進,並啟奏玉皇大帝處理。
 

文:中央專案組