一念無明X30歲想結婚買樓

(photo via cc Flickr user David Guyler)

 

政府其實最仆街既,我覺得莫過於令到幾代既香港人行為思想,係極惡劣既環境底下受到無情扭曲,而無做任何野去糾正。於是我地都唔再係正常人。而係平時用一種已經痴線既價值觀去生活,去JUDGE其他人。

點解香港依家既女仔普遍覺得三十歲唔結婚,就會係大限臨頭,然後會陷入絕望既剩女時代?又點解結婚又一定要伴隨住一層樓甚至種種婚禮影相大花金錢既物質副產品?點解生一個仔出黎又要叫佢學乜學物帶領佢贏在起跑線?點解到最後咁多人要走去跳樓?因為壓力將人迫癲。但壓力係邊度黎?除左係好多唔同既人身上施加俾你,更加多既,就係無形既壓力。

果種意識形態,果種日常生活鋪天蓋地既報道,果種道聽途說,果種人前人後既流言蜚語。我地成日都話唔需要諗唔需要去介意其他人講咩做咩,但係人就係群居既動物。人無辦法走出一個社群,自己入去野林生活。因此,一個人講,一百個人講,一千萬人都係度講,你會怕。你會被迫就範。想組織家庭係人類作為動物,傳宗接代既天性。但係香港,組織家庭可以俾取西經路途更難。甚至係要親情不顧。

 

 

例如今次個故仔係,男朋友個兄弟有難。個女朋友竟然想叫佢唔好幫佢,慳番買樓。呢D咁粵語片既倫常慘劇橋段,如果係2017香港發生,係堅既。咁真係無野可以講。呢個算係一個乜野世界?咪就係MAD WORLD。

我地都係咁樣俾社會迫癲。雖然不在其中既未需要面對問題,可以開心食花生,可以恥笑。但係到真係眼前問題係佢眼中出現,佢又HAN唔HANDLE到,係兩回事。我無辦法去抽時間去睇一念無明呢齣戲,唔知佢套片講乜,但講無力感,相信雖不中亦不遠。佛家亦有云,一善一惡,一生一死,都全係一念之間。

做人當然希望有自由意志同精神,可以任意馳騁傲遊於天地之間。但老實講,香港人今時今日,究竟有幾多樣野同時束縛住自己,真係無法可以數得清了。咁樣既思想一代傳一代,真係何必想將來!