人會變,月會圓,等到天時地利人和都夾到晒你咪贏囉

 

(photo via cc Flickr user Hotlanta Voyeur)

 

人會變就係人都知啦,只係無諗過一個人真係可以變得咁厲害同變得咁突然,好多時都只係一啲你諗都無諗過嘅原因而突然令你覺悟咁款,只能夠講真係天時地利人和一下子夾都無咁橋黎齊晒,然後事情要發生就發生,人真係好有趣,你講幾多嘢佢都唔會識開竅,但就係有樣嘢CLICK中佢就係中左,真係叮一聲大叫阿媽我醒左喇,除此之外,你真係唔好唔信邪,有啲事又會咁啱喺果一刻出現,然後改變左你嘅價值觀。

是咁的,我就有兩個大專時好熟嘅女(性)朋友,一個就娘娘收兵咁款,好多仔仔埋身,本身個人都好多朋友好SOCIAL,但又唔係要人送呢樣送果樣嘅,純粹好多仔喺手傾下計,放長線吊大魚果隻,係果啲要花好多時間去睇清一個男仔然後先會揀嘅女仔,所以每次出黎食飯都要跟進返佢同啲仔仔傾到咩地步,發唔發展得過,定係已經甩左幾件然後又有新人入伍。另一個就好喜歡食仔嘅,愛情同搞嘢就分得好開,拍拖時一心一意成個神級女友咁對待男友,但單身時就透過交友APP約下炮,無真感情嘅,有時我都好佩服點解可以分得咁開,然後每次食飯又跟進返邊度食左咩仔,仔仔性能力點樣呀果啲,但就係有個前度糾纏不清,明明甩左拖好耐,又仲會一齊食飯睇戲,大時大節又會一齊過,果時飛人又嫌人無上進心,俾唔到將來佢果啲又盛,宜家又成日出出入入,永遠都諗唔透佢想點。最近一次食飯竟然兩位囡囡都變左第二個人,嚇得我騰騰震呀。

先講阿食仔先丫,無啦啦講話同前度去旅行,當下已經屌左出黎,乜料呀,去乜嘢旅行呀,平時大時大節一齊過都算啦,仲一齊衝出香港?「無呀,我都去過啦,不過就係好想同佢去,如果唔係同佢去,我都唔會想去。上次自己一個人去時都已經諗如果佢喺度就好喇,咁今次有免費飛,問佢有無興趣一齊去,佢話去,咁咪去囉。」我問:「即係你無其他朋友嘅,係要搵佢去嘅,咁你地去到搞唔搞嘢丫?咁搞左係咪即係一齊返丫?」阿食仔話唔知呀,到時再算啦。然後就黎喇,無啦啦講自己個心態唔同左,因為近排發生左件事令佢對前度個諗法改變左,覺得佢俾唔俾到將來自己唔再咁緊要,最重要係前度喺佢身邊。乜料呀大佬!呢啲說話根本無可能可以出自佢把口呀,我完全接受唔到囉,由希望對方俾到將來自己,要住洋樓養番狗去到宜家唔介意前度俾唔到,亦唔嫌佢無上進心,太陽究竟是咪喺西邊升起左呀?我話:「你真係唔好嚇我,你係咪讀書讀到癲左?無啦啦做乜會咁諗?」佢就話事源佢媽媽有對夫婦朋友,個老婆就勾佬,但識返轉頭,而老公又原諒,咁個老公就去沙巴旅行,老婆話要同佢一齊去,老公話下次再同佢去,今次佢同朋友去,咁點知就係潛水果時發生意外,全團就係死佢老公一個。阿食仔就話呢一下俾佢覺得要珍惜眼前人,「講咩將來啫,話唔定到三十歲就已經死左啦,最緊要佢宜家仲喺我身邊,同我一齊好好咁過。」其實我個人一直都好BUY呢種諗法,因為人真係好化學,而且今日唔知聽日事,諗太多都根本唔到你控制,我驚訝點只係無諗過就係咁簡單一件老套到嘔嘅小故事會突然令阿食仔覺悟咁啫,無嘅,佢既然突然咁樣諗清,咪睇下事情發展,我都會想佢同返前度一齊返,都想佢開心嘅。

然後就要講阿娘娘喇,話說咪話娘娘喜歡放長線吊大魚,無返一年半載真係無可能得到娘娘嘅信任,之前都聽左好多仔仔同佢玩左好耐,最後啲仔仔都係不敵太長時間嘅磨練而收左皮,但諗都諗唔到,今次食飯係會有咁突破性嘅發展。唔聲唔聲,竟然同我地講話佢已經帶左個仔仔同佢屋企人去食飯,乜料呀又!果晚啲新料實在太衝擊呀阿媽!我同阿食仔個下巴一齊跌左落地,果個仔仔未玩返一年半載不特止,仲已經入左屋食飯!娘娘同仔仔熟左三個月,大家好投契,娘娘覺得有時唔駛講,仔仔都會知佢點諗同想做乜,然後不知不覺,帶仔仔去食飯果晚就俾人拖左手仔而竟然無縮手,我地已經驚訝到唔識俾反應,只係一味怒問即係點即係點?宜家擺到明佢等對方開聲啫,手仔都俾人拖埋啦,咁我都有問佢究竟是咪喜歡人呀,做乜宜家搞到咁被動俾人食住咁,平時都唔係咁架。娘娘無明確答到啲咩,只係好玄咁講左一句:「到呢刻仲未有樣嘢令我唔信任佢。」即係點呀?咁是咪喜歡呀?「我唔知,咁唔反感就無問題啦?」阿食仔就問:「乜撚嘢呀!咩唔反感就無問題呀?喜歡同唔反感係兩回事黎架喎大佬!你係咪玩嘢呀?」娘娘答:「我唔知呀,咁唔反感就即係鐘意架啦,我唔知點形容呀,但我可以講嘅係呢一刻仲未有嘢令我唔信佢囉。」我諗我大概明白掛?情感呢啲嘢又好難要下下界定得咁清晰,如果娘娘係好似佢所講單憑信任同唔反感就可以一齊嘅話,咁咪無問題,每個人都有自己嘅自由去決定點樣先想同一個人開始。

近來成日睇到講愛情黎嘅時候都係要講TIMING,唔關一齊左幾耐事,只要時機啱嘅時候遇上啱嘅人就可以好好咁一齊,唔知點解,某程度上我係覺得相當諷刺,前人種下嘅果由後人去享受。就係單單因為你出現喺一個唔啱嘅時候,又無配合到天時地行人和,你嘅出現就已經係一個錯,點樣都唔會修成正果?咁又唔可以咁斷定掛?因為人同事情每分每秒都喺度變緊,你種嘅果可能你自己享受返呢。最後好想送俾大家我近排成日諗起嘅一句,一句阿食仔個前度同佢講嘅一句:「其實唔駛下下都咁清楚。」