中出涉及風險,生仔之前請諗清楚

 

今朝老豆第N次哦我打機打天光。

老豆:「點解要咁樣折磨自己?有咩問題咪開心見誠攞出嚟講囉,見到你咁樣,老豆同老母都好心噏……」(DNLM!太遲喇!細個嗰陣你哋有關心過我咩?無錯,你哋係教曉咗我點樣分是非黑白,點樣做一個正直善良嘅人,但係你哋無教我點去愛人喎,你哋嘅所謂愛,從來都係責怪式和命令式,總之企喺你哋自己立場去關心我,就叫做關心咗,就叫做愛!於是現在你哋老咗,需要人照顧,我就要還養育之恩,係咪咁樣呀?)

我:「唔好煩啦!講咗幾十年仲講,你明知我唔會聽你講,你亦唔會聽我講㗎啦!」

老豆:「巴啦巴啦巴啦~」

我:「你唔好煩我啦!你有你生活,我有我生活,我成世人無掂過黃賭毒已經好好啦!」

老豆:「但係你而家咁樣自閉打機法,同吸毒有咩分別?」(好大分別!平好多!一隻game$3xx~$4xx可以打成個月)

你估我好想返工放工打機瞓覺咁嘅生活呀?貧病交煎嘅我,想自殺好多年,講出嚟你哋會幫到我咩?每朝瞓醒都係痛苦一日嘅開始,近來頸椎、胸椎和腰椎曲度有少許改善,起碼食咗安眠藥瞓覺嗰8小時無咁辛苦;但係對一個中度抑鬱及嚴重心理不平衡嘅患者嚟講,每日依時上班,強逼面對呢個不公義、冷漠及殘酷嘅社會,強逼面對一張張虛偽而勢利的嘴臉,我真係好想求個解脱!