叫男人陪行街,慘過叫佢返工。

 

叫男人陪行街,慘過叫佢返工。

「我真係唔明你啲女人,叫你跑步就話咁快無氣,行街行幾個鐘都若無其事。」銅牌斌仔好想返屋企打機,因為佢女朋友,姐係本小姐小銀花叫佢由將軍澳出黎朗豪坊行陣街都牙痛咁聲,我知佢想返屋企打League of Legend,想爬分,想做一個有用既人,唔想做銅牌仔。

「你打機打極都唔勁架啦!拎啲時間陪下我咪重好。」一講到打機唔勁佢又口黑面黑,我知剌中佢死穴──雖然我唔知點解打機唔勁都可以成為死穴。雖然本小姐溫柔婉約,無啦啦比人話「你啲女人」都係會嬲嘅。

眾所周知,女人成日做好多唔理智嘅事,例如特登激嬲男朋友,或者做特首。

行街買衫,當然少不免會入舖頭揀下,喺衣架前面揭下睇下有咩款啦,難得睇中一兩件,擰轉頭想問斌仔意見,喺我無望住佢嘅時候,佢已經行左出舖頭,拎住佢部死人電話按按按,又係打機。久而久之我都無癮,下下要叫佢返過黎,不如比個頸箍綁條繩等佢乖乖陪我買野啦──呢啲諗法講出黎又怕大男人發脾氣,女人真係好難做呀。

「不如呢!搵個頸箍箍住我,綁條繩,然後你帶我行街丫!等你無手打機呀!」作為一個女朋友,我咁講已經係醒目中既醒目,再蠢既人都應該知我投訴緊掛!點知蠢呢樣野真係無下限架喎,佢開口就話:「哎呀,出街之前可唔可以諗定買咩先再行呀,咁樣漫無目的行街都唔係一次兩次,行到身水身汗又買唔到野,好嘥時間姐。」

姊妹們,你話你嬲唔嬲?

我心諗,行街就梗係行下睇下靚野格下價架啦,如果我次次出街都一定要買到野先返屋企,而我又係要男朋友比錢嗰啲女仔,斌仔肯定又話我港女,又話洗錢洗得多。啲男人真係好煩,平時食飯我又唔係事必要你請,你又次次堅持,搞到我又要時不時扮下細心體貼請返轉頭。

其實我餐餐AA都OK架,作為一個女朋友,我都無乜要求架啦!男朋友得閒比啲時間出黎陪我睇下衫比下意見,window shopping都開心架啦!你又死都要打機,行個街都目標為本!咁不如連人生規劃都一齊目標為本啦!結婚擺酒簽字買樓……唉唔提啦你又話我港女。
喺香港生活真係好難,女仔人家已經唔諗生活上要男朋友Carry,去左男人份重擔,依家要佢地細心少少,有耐性少少姐。講錢又嫌市僧,唔講錢又話啲野做黎無意義,行街渣嘛!咩漫無目的姐!

行下就係個目的啦!我陪你通宵睇波嗰時,我都無話電視機入面廿二個麻甩佬追住個波追足九十分鐘漫無目的啦!男人有時講野真係唔知自己Hurt到人既!

哼!