入得大學,唔係仲諗住讀書呀嘛?!

 

(photo via cc Flickr user Francisco Osorio)

 

入得大學,唔係仲諗住讀書呀嘛(振振有詞聲)!

香港既大學自有一套同出面社會一樣都差唔多奇怪既約定俗成或者傳統,新生係無辦法亦都無權挑戰,因為大過佢地既覺得呢種思想盤古初開已經存在。為左要令大家更有「精神」,更講「團結」,等你可以正式成為做個「有用既大人」,你就會面對所謂師兄師姐既種種「思想再教育」,甚至係必須聽從佢地既指示。否則,你就會被「仙」。所謂被「仙」。呢個亦係大學精神公理既一部份,你否定,即係否定佢地成套思想,當然係唔會令你好過啦。

從OCAMP開始各種匪夷所思遊戲,到上莊傾莊,到住宿等等呢D大學等同係必須參加既活動(否則你就會被定義為摺,廢,頹,毒,不合群),都會有好多奇奇怪怪既活動,例如:唔俾訓覺,半夜去操BEAT,甚至好似依家新聞報導傳言要放生蛋落你下面同你慶祝生日甚至要點香滴蠟等等。外界覺得呢班人玩到SHORT左,但係佢地一心就係要以呢D「日常生活無傷大雅既惡作劇」,黎到加深彼此既感情,以顯示大家係一家人,先可以咁玩都無事。你地鬧係唔明人地果度底蘊,根本不適宜指指點點既。

係既,如果雙方都AGREE,而且真係玩得好開心,仲可以將D蛋傳黎傳去,你辣我JJ我燒你XX,你掟我入未圓湖,我掟你出維港,咁或者旁人真係無可置喙掛。但有無人其實係唔多想玩,又要迫於無奈接受,甚至係反抗,想問我入大學真係想有個私人時間做下自己既野,係咪咁都唔得呢。EH,呢個問題真係好難答。當然MODEL ANSWER都係有既:

「我地之前都係咁俾人玩,唔通你有得通融呀?認命啦。」好多野稱作傳統,不論好壞,都係因為咁,得以一代傳一代。同返工要OT一樣,無人講,大家自動識做。開心子格係。