係擅長less is more 嘅朋友呢——睇完《動物朋友》嘅感受

 

《動物朋友》係上一季動畫嘅黑馬,我都係最近先走去補番-係喺佢創造咗奇蹟之後(即係喺資金同人手緊綴嘅情況下,而且題材比較奇特,但係最後BD銷量極好。),好奇心驅使我睇吓究竟係發生咗咩事。睇完十二集,確實係有一種畀清風吹過嘅舒暢同滿足呢。坊間已經有唔少人分析咗《動物朋友》爆紅嘅原因,所以與其客觀去分析,倒不如等我講吓自己欣賞《動物朋友》嘅地方、分享吓《動物朋友》點樣畀到呢種清新嘅感覺我。

如果要總括《動物朋友》嘅特點,我會話係「簡單就是美」。雖然唔係話簡單就一定會成功,但係當唔少動畫都係追求𡁵複雜同有深度嘅時候,咁簡簡單單就會成為清泉。另外,有時過份簡單會令到一部作品變得膚淺幼稚、沉悶無味,而我覺得《動物朋友》喺「簡單」呢一點上拿捏得唔錯。佢減走咗好多繁絮嘅枝節同傳統,保留到重要嘅核心,去蕪存菁,最後嘅得出嚟既結果既簡單、又有趣,仲畀到人一種完整、完滿嘅感覺。

 

--以下有劇透--

 

第一樣要讚《動物朋友》嘅就係佢簡單而且到位嘅劇情同世界設定。《動物朋友》雖然係輕輕鬆鬆又一集,但係佢並唔係一部冇明確終點嘅日常番。一路睇《動物朋友》嘅時候,我發覺自己一直都喺度期待住個終點,好想睇到謎底被解開嘅一刻。基本上,我哋觀眾同主角小鞄嘅處境係一樣嘅,都係無端端、冇頭冇尾冇原因咁畀人抌咗喺一個奇特嘅Safari Park入面,所以我哋可以同小鞄產生到共鳴。觀眾並冇收到額外嘅資訊,冇旁白、冇另一個視點、冇背景資料,小鞄見到嘅嘢就係我哋見到嘅嘢,所以觀眾其實係同佢一齊喺度解𡁵迷嘅。

表面上,對小鞄嚟講,最大嘅謎團就係究竟自己屬於咩物種。但係對觀眾嚟講,我哋當然估到小鞄係人類啦;所以最令我困惑同感興趣係,究竟呢個世畀係個點嘅世界?係點嚟?係發生咗咩事?製作團隊就係簡單直接咁捉緊呢個謎團,照住適當嘅節奏將佢解開,然後喺結局畀到一個完滿嘅解釋畀觀眾。呢種係還原基本步,將最基本嘅嘢做好佢。喺十二集動畫入面,編劇冇再疊加新嘅謎團上去,冇將謎團發到好大去搞,亦都冇將旁枝末節加喺謎團度,就只係專心處理呢個謎-點解會有一個冇人嘅奇特safari park喺度?對我嚟講,呢個謎圑就好似天藍怪嚿石頭咁,係《動物朋友》呢套動畫嘅靈魂。如果唔係有呢個謎貫穿喺成季動畫之中,咁每一集嗰啲小劇情、動物朋友同小鞄之間嘅互動都會變得索然無味、失去意義。

咁《動物朋友》係點樣處理呢個謎團呢?我覺得有幾點係值得題及吓嘅。每一集《動物朋友》雖然係獨立嘅單元,都係講小鞄同藪貓點樣幫其他動物朋友解決問題,但係好多時呢啲小劇情係同個謎團有關。譬如第二集要修理巴士、第三集要去山上面嘅咖啡室幫架車嚿電池差電。呢啲任務其實係加深緊觀眾對個迷團嘅感受,係間接畀多少少資料大家去估究竟件事係點。

譬如當我第一次睇到有架荒廢巴士時,我會諗:「哦,原來作者係想喺故事度埋一個謎團。咦,好似有啲嘢喎,唔係想像中咁簡單、咁幼稚。」然後又會令人進一步諗到:「究竟點解有架荒廢嘅觀光巴士呢?點解冇人?發生咩事?」第三集去到咖啡室又係一樣,你會明白成個世界原來唔係荒野,而係一個經過精心設計嘅場地,有各種設施喺度。第四集見到條人造隧道又係令人印像深刻。無論劇情又好,場景又好,都明顯但間接咁提醒觀眾係有一個謎團喺度。除咗每集劇情牽涉個謎團之外,劇入面有好多小事、對白都會挑動觀眾嘅好奇心。譬如點解lucky beast剩係同小鞄講嘢呢?點解會話人類「絕種」呢?點解會動物朋友會唔知人類實際上發生咩事呢?點解lucky beast間唔中會出現第二把聲呢?等等。

成套動畫由一至第六/七集係解答喺小鞄嘅問題,就係佢要搵到自己係咩動物。由七集打後就係解答𡁵我哋嘅問題:啲人去咗邊呢?去到動畫中段,亦都多咗以動物朋友嘅對話內容間接揭露更多有關謎團嘅嘢。再去到尾段,就係有未來小姐嘅錄音同錄影片段更加清晰咁揭示謎底係點。呢度都會見到有個舖排,開頭係好間接隱晦咁畀大家估多啲,到大家已經投放咗心神落個謎團度,後期就慢慢、逐啲逐啲咁將個答案揭露出嚟。

去到最後,編劇冇固弄玄虛咁整啲open answer出嚟。結局真係解答返晒由一開頭開始建立嘅種種疑團。所以我作為觀眾睇完係有種完滿嘅滿足感。(對比起好多改篇自輕小說嘅動畫做左一季之後個結局好似唔嗲唔吊咁…) 作者亦都喺某啲位故意留留白,等觀眾有少少想像空間。譬如點解之前藪貓會同過未來小姐一齊嘅探險呢?我會估係暗指藪貓曾經畀天藍怪食過,所以佢先會冇咗呢段記憶;而且先會聽到把佢把聲後流淚。除此之外,有關劇情設定講多一點,就係其實成個故事個世界設定係好聰明。「冇人嘅世界」同「荒廢嘅樂園」,其實就呢兩樣個元素,將佢哋放埋一齊本身已經係好引人入勝。

講吓劇情以外嘅野。《動物朋友》有一樣嘢係我覺得都幾特別,就係人設其實係非常簡單。除咗藪貓、小鞄同lucky beast之外,其餘角色幾乎冇背景、冇過去、冇連貫,老實講係好平面嘅角色。甚至其實藪貓、小鞄同lucky beast嘅性格喺頭十集都相對係好簡單。都係嘻嘻哈哈又一集(唔完全係嘅…不過大致上係)。亦都好特別嘅係,《動物朋友》嘅角色某程度上係脫離咗一啲近年動畫角色既有嘅定型,表達出嚟嘅性格係相對中性同平淡。對白亦都係好簡單,講嘅野好似天真嘅細路咁,好似乜都好好奇咁、乜都好開心咁。亦都近乎冇內心戲、冇獨白、冇明顯嘅深入情感。呢堆特點係咪一定好呢?其實未必㗎喎,但係放喺《動物朋友》度就唔知點解好似夾得到咁。或者都係因為啲角色本來係動物嘅關係,本身就冇人類咁複雜,所以觀眾接受到佢哋有呢種傻吓傻吓、呆萌嘅感覺。除咗人物性格設定,人物作畫都同其他動畫有少少唔同嘅感覺。《動物朋友》嘅角色唔可以靚嚟形容,佢哋個樣真係畫得好簡單。但又唔可以話用頹形容,因為每隻動物朋友其實都好有特色,係照住真實動物嘅特點去創作。另外,以全女班嘅角色,但係唔賣肉、唔賣䚍、唔賣身材,我覺得呢種情況係好少喺近年嘅動畫度出現。始終好多時作品係要靠啲樣貌娟好、身材火辣、加上賣肉嘅女角嘅周邊產品去賺返一筆。喺呢一點上,《動物朋友》都畀到一種與別不同嘅感覺畀我。

正因為成套動畫大半都係有種簡單愉快嘅平淡,所以最後兩集嘅大扭轉絕對係畫龍點睛。其實第十集已經舖排𡁵少少。當藪貓聽到未來小姐把聲,佢係不由自主咁流眼淚,而當時劇情冇喺呢一點上多加發揮,但係已經明顯係有一個轉變。到咗最後兩集,氣氛明顯沉重咗,講到友情同犧牲嘅主題。小鞄犧牲咗有得避難嘅機會,願意去同動物朋友處理難題;藪貓為咗救小鞄,一下打走小鞄然後畀天藍怪食咗;Lucky beast為咗救大家,願意喺開船引天藍怪,然後整沉架船同歸於盡;小鞄為咗救藪貓,用火把去引開天藍怪,然後最後遇難。對我嚟講,成套劇最深刻嘅一幕莫過於小鞄側面望鏡頭(藪貓嘅方向),微笑住咁講:「多謝你,要好好..」然後畫面一黑,佢畀天藍怪成隻腳掃走咗,之後直接播ED。呢段表達嘅手法完全顛覆咗我對成套動畫本身個印象。睇嘅時候都覺得係幾震憾。

喺最後兩集入面,成套劇一直冇出現嘅深入感情,好似壓縮氣體澎脹咁一下爆發出嚟,係完全想催人淚。頭十集幫小鞄、藪貓同Lucky beast喺輕鬆嘅旅程之中建立咗默契同友誼,亦都令觀眾產生咗對佢哋熟悉嘅感覺。對我嚟講,我係冇諗過第十一十二集會有明顯分別,我以為係會開開心心搵到謎團嘅答案就大團圓結局。但係原來編劇喺第十一、十二集係用呢啲之前建立咗嘅嘢一次過咁挑動觀眾嘅情緒。面對朋友嘅死而無能為力、面對唔捨得朋友嘅離去、面對要忘記過去嘅友誼同經歷、面對犧牲自己救同伴嘅抉擇,呢啲全部都係想錐心嘅劇情。當然亦都有啲正面嘅感動位,譬如成套劇出現過嘅動物朋友因為受過小鞄嘅幫助,都一齊出現返去救佢;之後又見到小鞄學咗藪貓嘅爬樹去救藪貓,藪貓學咗小鞄第一集嘅摺飛機去救小鞄;同埋最後小鞄醒返,藪貓驚佢已經冇晒記憶,不過小鞄同藪貓講返一句:「請唔好食我啊。」「我先唔食你呢!」,對應返第一集開頭嘅對白,呢啲都係令我印象深刻啊。

最後要讚嘅係製作團隊嘅認真。佢哋真係有去研究過吓動物習性,然後將佢融入劇情度。有啲位幾令人會心微笑。譬如話見到otter玩石頭、水豚浸溫泉、動物普遍驚火、但棕熊唔驚火等等等等。最後仲推動到觀眾對真實動物嘅好奇心,呢點都係我好欣賞嘅地方。