Flow Books 已遭封舖,書友不捨守護

* * *

凡愛書人都知道 Flow Bookshop 。因書太多而無從轉身的角落,那才是真正書店的感覺,看到藏書家的書和愛有幾多。

惜書不抵租,去到書店才知已封舖,但令人嗟呀者卻不在此。是故舊陪著老闆,守護在書店門前。

* * *

Tim

「因為我係啲書嘅朋友,係啲書 call 我嚟。讀書時搵二手書,已經知道依間書店。

我比較鍾意哲學同文化嘅英文書,但現代嘅經營模式,只著眼多數人嘅需要。依度嘅書更符合我興趣,不時會發現好珍貴嘅版本,外面嘅 bookstores 唔會遇到。

更重要係同老闆,同其他讀者嘅交流,好特別好神奇。」

* * *

Jeffrey

「我就係透過朋友 Tim,認識依間書店同老闆樹單。好欣賞書店嘅模式,同佢待人接物嘅態度。佢認識每個顧客,介紹佢睇咩書,甚至直接送本書畀人地。香港嘅書店都比較商業化,好少有依種模式,Flow Bookshop 係用友誼來經營。」

* * *

Anna

Anna:「我識你有冇廿年?」

樹單:「啱啱廿年囉。」

Anna:「我大約十歲時識左老闆。。。」

問:「你十歲時點識老闆?」

Anna:「你唔好咁認真,講笑咋,唔好講到我年紀太大。我十一歲識左老闆,每到 lunchtime 就走上嚟睇書、傾偈。

書店嘅模式好舒服,唔係講錢而做。每次見面大家都用心交流,老闆記得你講嘅所有嘢,唔係『食左飯未』嘅問候,而係真嘅關心。

好多同類型舖頭,因為冇人幫襯而關門,但老闆堅持留塊青草地喺度。Starbucks 唔會有依種感覺,依度俾我唞氣,做番我真正自己。」

* * *

樹單

造訪當日,筆者問眾籌還差幾多,但老闆說不上,因為他還未查看。

「Flow Book 存在喺度,從來唔係賣書,而係傳達同分享一種態度。一種值得欣賞,我想秉持嘅態度。

依個禮拜做到嘅嘢,好多年都未必做到。我唔係高興有冇希望救亡,而係大家感受到真誠分享嘅態度。

我鍾意依個字眼,give and receive,依個禮拜就係最有力嘅證明。大家都收到,二十年所做嘅嘢冇白費到。」

* * *

「For Saving FlowBooks’ Micro Crowdfunding, pls deposit to HSBC acc: 5717012487 LUMINUS 」

http://flowbooks.net/

https://www.facebook.com/flowbooksnet/

* * *

後記

早已忘記初見的細節,當時公民廣場仍然開放,因事通宵留守。天亮後不記得是慕名造訪,還是信步邂逅,總之踏上了 Flow Books。只記得一晚沒睡,好攰好攰,但仍和老闆談了好久。

睽違不知幾年,老闆立時說出自己名字。冒昧道出來意,老闆說我未變。但願如此,我卻自我懷疑。