廿五歲嘅IU真係好正!

 

如果你唔係太識IU係邊個,可以介紹返,佢係韓國唱作女歌手。佢嘅歌,你係Youtube打佢個名,我都幾夠膽講求其篤一首都唔會話難聽。我相信大部份人識佢,都係因為佢嘅成名作《Good Day》(包括我),後段令人津津樂道嘅「三段高音」,基本上當時每次現場演唱,觀眾都係期待佢唱「三段高音」。《Good Day》為IU帶黎一切,令佢紅遍亞洲,但亦某程度成為左佢嘅包袱,先唔好講佢自己唱到厭,樂迷之後又會期待佢嘅新歌都係呢類show唱功嘅大歌,忘記嗰個可以彈住結他,好溫柔咁cover《Gee》同《Sorry Sorry》嘅佢,忘記左佢嘅多樣同多變。

之於我,IU係一個有想法嘅歌手,唔係純粹Kpop偶像。IU咁紅,唔單單因為佢嘅歌藝,又或者佢嘅樣貌同身材,而係佢嘅歌、佢嘅創作有種魅力。《Palette》專輯主打歌都係叫《Palette》,IU包辦詞曲,輕鬆,但節奏感好重,加埋佢把聲就十分好J,唔誇張咁講,係上半年最好嘅kpop作品之一。首歌係講佢本人踏入左廿五歲嘅一啲變化,檢視下呢個年紀嘅自己。其實佢唔係第一次用自己年齡當題材寫歌,兩年前就寫左首《Twenty three》。《Paletta》歌詞提到廿五歲嘅佢比起粉紅,依家更鍾意深紫;比起當初留長長嘅直髮,更鍾意依家嘅短髮。而當中我最深刻嘅,係廿五歲嘅佢,意識到有啲人會鍾意自己,有啲人會討厭自己,但佢都係「truly fine」。嗰種豁達、幽默,成熟,加入創作裡面,就令我覺得呢個女仔真係唔簡單。

《Palette》入面有一段係G-Dragon feating嘅rap,當中嘅rap詞都係GD自己寫,IU話覺得GD把聲同首歌好夾,所以即時就諗起佢。計我話,首先擺明就係商業計算,一加一大於二嘅雙贏操作,GD feating喎,歌未出已經哄動喇。不過,老實講GD段rap的確令首歌生色不少,佢以一個樂壇前輩,或者大家都係一線Kpop偶像,又或者哥哥嘅身份去睇返廿五歲呢個年紀嘅好同唔好,帶點勉勵,就好似對話嘅感覺。而其實IU現場演出呢首歌個陣,會唱自己寫嘅rap詞,仲自己rap埋,佢自己嘅rap詞就係另一種味道,某程度黎講我覺得仲正過GD,大家不妨係youtube搵黎聽下。

話說,當年IU爆紅個陣,好多人都拎佢同未上太空嘅Gem比較,因為兩個都係小巨肺、而且又係十幾歲就大紅,又會作下曲作下詞,有唔少共同點。可惜,阿gem佢已經離開地球成為宇宙巨漿,咁我唯有聽返啲仲係地球嘅歌手。當年以為十八歲唱《Good day》嘅IU已經好正,點知原來廿五歲唱住《Palette》嘅IU仲正!