京都沒有念慈菴

 

法蘭沒有西多士,京都沒有念慈菴。自從天澄出世後,旅行多數都係坐廉航。一嚟多數都係去日本,二嚟廉航係好準時起飛。呢幾年搭過幾次因航都係 delay嘅⋯⋯

每次去日本兩大一細來回機票都係三千幾蚊,加住 AirB&B USD90樓下一晚,一個旅程大概HKD9000基本左右。根住當地車錢雜費兩個加埋HKD2000左右。未計食同買嘢大概HKD11,000左右。一般日本景點入場費唔貴,迪士尼嗰啲就另計。

飲飲食食方面,我地都好經濟。有時松屋300円可以一餐,普通麵檔拉麵650円又一餐。就算食豐富啲,壽司刺身、燒肉10,000円都好好食,對返港紙都係700蚊左右,一家人食呢個價錢都係經濟。平均每日應該唔過1000蚊港紙,即係六日五夜大概HKD5,000左右,total 變成HKD16,000。

比較放任少少買嘅嘢就係立雜嘢。我地鍾意行市場同超級市場、100円店同街頭便利店。每次行超市都會使5000円左右,一日可能行兩次或以上。會買下啲生活用品,多數日本製嘅。另外就係行市場買生果,見到提子就會好想買。3000円嗰啲都好好食,岡山嘅青提外表膠膠地嘅幾好。仲有就係車厘茄同士多啤梨,天澄好鍾意食,一般熊本嘅都唔錯。咁大概每日10,000円左右啦,七百蚊港紙一日、total 4000蚊左右。加加埋埋就20,000港紙啦。

20,000左右一家人去一次旅行,算係咁。

日本,好多地方仲未去過,北海道未去過,廣島橫濱未去過,好多好多都未去過。去過嘅地方我最鍾意係京都,老婆就鍾意福岡。我鍾意京都帶有古都氣息,每個地方都既特別亦讓旅人可以心靈上休息。當中仿佛每一條街道都有歷史人物走過的影像一樣。而京都市民好有禮貌之餘亦比其他城市親切。喺步伐不急速嘅環境下,京都有著世界一流交通運輸系統、餐廳選擇豐富價錢合理、生活所需方便容易不遜於東京、大阪,京都係一個糅合動靜新舊所有元素嘅城市。