去KFC 叫雞,一定係叫家鄉雞

 

去KFC,識揀,一定係揀家鄉雞。

好多人話KFC係垃圾食物,唔健康又肥,我真係笑而不語,唔通你食嗰啲三文魚又好健康啊?仲有,個人肥就食乜都肥喇,你唔做運動就乜都假!再講,你有無聽過有人食完KFC中禽流感?反而有禽流感政府就即刻殺街市雞。

相反,KFC嘅家鄉雞就以蔗渣嘅價錢,提供燒鵝髀嘅質素,直頭係對香港呢個物質社會嘅一個控訴。點解係家鄉雞?無錯,KFC的確創做左好多個高峰作品,但要揀一種代表作,必然係歷史悠久嘅家鄉雞––KFC嘅靈魂所在。望落去家鄉雞唔顯眼,佢未必有金黃色嘅外表,未必有閃令令嘅油光,甚至連香味都要行近先聞到。但其實咁係因為佢唔中意出風頭,真係識食嘅人係唔會比呢啲外表野呃左。一咬入去, 無細骨,雞髀幼嫩多肉汁,雞胸啖啖肉有口感。先接觸舌尖嘅係雞皮,雞皮上嘅味精配鹽同香料,唔會太咸令人食唔到之餘,佢嘅餘韻保持到去你食雞肉嗰下,形做到一個「啲雞好入味」嘅錯覺,令本來無乜味嘅雞肉突然提升幾個層次。所以食KFC唔食雞皮不如唔好食!

再數,家鄉雞嘅份量不多不少,配其他食物進可攻退可守。餓嘅話可以配飯或者薯容;想再重口味啲嘅可以整多盒巴辣雞粒;再唔係食個葡撻做甜品;如果約埋三五知己就可以召喚家鄉雞桶餐,以更優惠嘅價錢買到之餘,亦可以拉近人與人之間嘅距離(麥記邊有多人套餐,唔計自製)。

家鄉雞,係KFC嘅靈魂所在,雖然KFC嘅A1 A2有時會有驚喜,但無論世界點變,做雞嗰個做得幾差都好,we do chicken right,家鄉雞都係實力嘅保証。對比起韓國炸雞貴又難食,雞無雞味,KFC無得輸。