堅尼系數新高?無收入嘅廢老分分鐘有錢過你N倍呀廢青!

 

稍有常識既人,都會知道『貧富懸殊』同埋『收入差距』係兩個完全唔同既概念。遺憾地,得罪講句,香港人真係好多連常識都無。

你去東區行一轉,好多老人係度退晒休日日食茶餐廳。你問佢地依家月入幾多錢,佢話佢已經無做野,點會有收入?OK,你同佢傾傾下,點知再散多一陣步,佢話要返屋企,已經行番番去太古城。佢有三四個物業,每個千幾萬。你自己月入雖然萬二蚊,但係你心底明白,自己賺多三五十年,都無可能夠呢個廢老有錢。

係收入上,你係贏左。但資產上,你輸左九條街。邊個貧,邊個富,大家好清楚,根本收入唔能夠有咩大既代表性去表達一個人既貧富情況。而堅尼系數所用既數據,就單統係收入。量度既,自然就係一個社會既收入差距,而唔係貧富差距。你以為統計處有咁神通廣大,會問到你老豆老母有幾個物業同股票,然後佢又肯答咩?唔好傻啦。

其實,只需要花幾秒時間,Google 一下Gini Coeeficient 呢個term,或者係堅尼系數,自己睇下維基百科,係好容易(我唔去講咩曲線咁複雜喇)。佢會好清楚話俾你聽呢個數字,真正含意係乜,局限係乜。但係我相信香港人大部份一定好少理,然後一見到咩HK01呀,毒果呀,白粉呀,齊齊此刻口徑一致出黎話香港貧富懸殊46年新高,一定即刻激動轉載啦。

有無人計較過點解46年新高?係因為之前既普查,只係得人口數,而無問到收入既數字渣。所以46年呢個數字是無意思的。Anyway,人人鬥快做標題黨,大家開心。真相既野,WFC呢?又可以有堆人衝出黎話要叫加最低工資同埋搞全民退休喇。爽呀。成日話垃圾媒體歪曲事實,誰比誰高尚呀。

到頭來,咪又係一齊呃click。哈哈哈。