「公眾係白痴」——呢句說話出自民選議員鄭松泰把口真係特別有味道

 

尋晚係知名網民無敵神駒既直播節目當中,播出左一段鄭松泰係熱血公民內部工作組既聲帶,內容圍繞住選後熱普城之間既種種事件源由,此段錄音已經由鄭松泰本人證明屬實。其中最令人哇然既,就係佢提到「公眾係白痴」一句。播出之後,各不同派別既人都到鄭松泰既Facebook帳戶留言質問,下場大多都被封鎖。

公眾係白痴,我講得、你講得,就算任何一個師奶維園阿伯,痴線到如劉馬車,低能到好似阿叻咁,都可以講,惟獨係民選議員係點都唔可以講出口。以前有個陳鑑林講遊行既市民都係被誤導,佢都尚且係講緊對家既支持者,但今次鄭松泰口中所言,個種自以為高高在上既語氣態度,根本就係當公眾作為自己選舉工具,可以欺瞞,可以利用。而事實上佢真係靠公眾去獲得今日民選議員、代議士既身份。抱住公眾係白痴既心態參選,咁佢係選舉過程中,到底有幾多說話係真,又有幾多係欺騙緊你地既信任,真係不得而知。

咁唔尊重選民大眾既議員,去同你講佢係為你爭取緊公義,為社會爭取緊民主,你地真係可以信任佢,可以信任佢地組識?

見到鄭松泰以及佢地既支持者提出,佢只係一時失言,又或者覺得佢講得無錯,甚至有不相關既人認為覺得「公眾係白痴」先係做一個帶領者既基本條件都好,各有立場各有睇法,無所謂。但惟獨一個事實係無辦法改變,就係當一個民選議員,被公眾知道佢根本唔尊重自己既時候,無論佢係公開場合講,或者係私下講都好,今時今日始終都已經暴露於公眾面前,而佢民選議員既生涯,應該都見唔到下一屆會成功連任。單單係選舉之後顯現既反骨,被表露於公眾既表裡不一,以及發自內心既傲慢,你覺得上屆五萬幾票,會剩返幾多?

所以我奉勸鄭松泰一句,今日開始改口「沒有黃洋達我們甚麼都不是」,安心做你既兒皇帝,祝你係熱狗仔隊資金下興建既方舟建成之日,你仲未變成幫過黃洋達既契弟,可以帶埋家人上船好好繁殖,你仲年輕,未來屬於你架。