老土啲講句,愛真係要及時

 

「你媽咪病咗,快啲去醫院睇佢。」我剛開會回來同事Kate便對我說。
「咁大件事點解你頭先唔打電話畀我!」我激動地說。
「因為就算打畀你,應該都已經趕唔切…」Kate吞吞吐吐地說。
「咩意思?咩趕唔切?」我說,隨即有不詳預感,於是我決定唔理Kate直接走出公司同打畀媽媽,卡都無拍。

「喂?」我說。
「喂…」媽媽說,把聲無神無氣,平時佢一定唔會咁樣,好唔妥。
「你…係咪病咗?喺醫院?」我說。
「嗯…」媽媽說。
「你喺邊間醫院,我而家即刻搭的士過嚟!」我說,並一路截的士一路喊,已經開始崩潰。
「唔使趕喇女,趕唔切喇…」媽媽說。
「咩趕唔切?你喺邊間醫院呀?你話我知啦?邊間呀?嗚嗚。」我說。

7:55am,鬧鐘響,我嚇醒咗,眼角仲有淚水,即刻衝去望下媽媽有無事,原來佢仲瞓緊覺,即刻安心晒,呢個係我咁大個女發過最恐怖嘅惡夢。平時嘅生活總係為咗工作而忙,唔計瞓覺嘅時間,見老闆同同事一定多過見屋企人。放工返到去已經得返半條人命,有時都攰到唔想講嘢,可能媽媽問多幾句都覺得煩。夜晚亦唔係成日返屋企食飯,有時加班太夜唔想佢哋等、有時去咗拍拖、有時約咗朋友食飯、有時去咗做facial或者massage,總係有好多原因。

早排睇咗套戲叫29+1(含劇透),有幾個畫面好催淚,就係戲中嘅阿爸患咗老人癡呆症,咩都唔記得,淨係記得個女嘅電話同打電話叫佢返嚟食飯,但係個女工作好忙,成日都要開會,根本唔得閒理阿爸,甚至嫌佢煩,阻住晒,最後阿爸有事入咗醫院,個女辭職喺醫院陪佢,畀晒所有時間佢,不停同佢回憶往事,但係已經太遲。

呢個劇情其實好現實,其實大家都知道要對屋企人好,但奈何打工仔嘅生活真係太辛苦,壓力好大,工作量好多,可能連休息放鬆嘅時間都唔夠。永遠對住老闆態度係最好,對住屋企人態度就最差,因為知道屋企人永遠都會原諒你,唔會嬲你,最錫你。睇呢套戲會喊,係因為你會代入角色,好驚屋企人真係有一日突然有事。

平日你可能未必察覺到,但其實細心一諗,你就會發現父母真係老咗好多,病痛多咗、行動慢咗、食嘢少咗、白髮多咗。生老病死、意外嘅嘢真係無人知道幾時會發生,亦唔到人去控制,唯一你可以做嘅就係好好珍惜每一日,去愛你想愛嘅人,所以愛其實唔止要及時,係要時時。喂,仲諗?我已經訂咗枱帶屋企人去食好西喇,你呢?

 

P.S. 我就係睇完套戲就發惡夢T_T