喺香港,身為男人就有原罪

 

《原諒他77次》睇到戲名就唔想睇——
總之錯嘅一定係男人(反白眼)然後大愛包容嘅永遠係女人。
睇埋trailer——
總之一嗌交,受傷害嘅就係女人;明明遇到問題時,阿Sa都冇鼓勵過比比鳥,淨係批評對方信唔過。(反白眼)

究竟娛樂圈同傳媒係咪嫌香港男人唔夠慘,仲要灌輸幾多「男人唔遷就女人就係蝦女人」嘅歪理?
「唔係要你幫,只係希望你唔好落井下石啫。」
就算唔拍套戲教育女人「男人都需要鼓勵㗎親」,都唔好為咗話題同票房拍套女人戲,所謂得到女性觀眾共鳴,實際上加深「女性往往係感情中嘅受害者」此等刻板觀念丫,女性觀眾trap喺個同溫層夠耐喇。

君不見好少男人會因為生活細節同女人爭執,撩交嗌嘅十居其九都係女人。
唔順女人心意就係錯,廁所板一定要跟女人習慣擺、牙膏一定要跟女人習慣擠⋯⋯you name it.
明明大家都係住埋同一間屋,佢冇放返塊廁所板落嚟你順個手好蝕咩,你去完唔揭返塊板上去佢夠次次痾尿之前都要順個手啦。
牙膏喺邊度擠起真係咁緊要咩?總之擠到擠唔出咪換過支新嘅囉。
如果你睇佢唔順眼嘅核心原因係其他事嘅,就去解決個核心問題,唔好用呢啲不痛不癢嘅事嚟做籌碼。

互相尊重其實唔關感情事,係關做人事,尊重他人其實唔使睇對方係男人定女人,我因為你嘅性別而尊重你其實都係歧視。
偏偏好多香港女人有種根深蒂固嘅「受害者心態」。
係嘅,發生問題嘅時候,打盞spotlight做悲劇女主角,將責任推喺對方身上,自己可能會好過啲嘅。
但感情上其實有邊個係受害者?
就算對方出軌,自己一定完全冇責任?明明愛另一半嘅男人都出軌,一般原因都係悶、性生活不滿足、不被重視⋯⋯喺呢啲層面上,男人都係關係中嘅受害者。
如果對方根本係player,自己睇男人冇眼光其實都係責任嚟㗎傻豬。鬧對方十句之時唔該鬧返自己廿句。
有時唔係遇唔遇到對的人嘅問題,唔改變自己嘅心態,遇到咩人同咩人拍拖,始終都唔會幸福。

唔想下下喺感情上原諒對方,先做好自己,做一個有智慧嘅人,自然會做到一個有智慧嘅女人/男人。

 

(我覺得夠Sa好cute㗎,比比鳥睇落都好真誠。如果套戲唔係我講咁嘅,話我知,我去戲院睇,然後還套戲正名。)

 

另,
有種女人覺得自己睇猛鳩語錄同十萬個激嬲女友的理由識得笑,就係明白男人,同其他小氣嘅女人唔同,然後自我感覺良好到天荒地老(反白眼)。
呢種女人like嘅唔係個page/post,係自己。