作為女人,我都戥男人慘

 

今日喪煲ViuTV,煲左Girl’s Talk愛情信箱,裡面有集講求婚必備,當中有戒指、鮮花、親朋戚友、錄影、下跪、流淚,幾位主持就講下自己被求婚嘅話要啲乜,講下講下就講左好多要求,好似好合理,但其實我係覺得好奇怪。

對我黎講,男女好平等,我唔會要求對方一定要做乜,例如情人節要送花、出街要送我返屋企等(我唔係咁嘅人所以諗唔到仲有咩例子),然後我一邊聽佢地講一邊諗,就好似阿妹有講求婚時唔一定要送花,但情人節時一定要送!其實點解要男人做咁多咁嘢呢,點解男人就有嘢係一定要做呢?點解女人係有所謂話事權去界定男人「要」做啲乜?通通我都唔明,明明都係兩個平等嘅人,只係性別唔同,如果你話女生拎唔到重嘢要男生做,呢個我明,因為係體力上嘅限制,咁又或者係要依賴男生去認路,因為女生相對喺呢方面天生比較遜色,呢啲都係礙於天生嘅限制,但點解做乜都要有條件有要求呢?係因為社會長久以黎建立起黎嘅性別定型,對我黎講,真係學前幾日有位人兄所講「男人嘅出生就係一種原罪」,絕對係架,好多嘢你地都要自己識做,好似BORN WITH IT嘅能力咁,講真,我作為女生,都覺得你地好慘。

我唔係男人,我當然唔知佢地被社會咁樣定型,界定左要做呢啲嘢其實係咪某程度上都令佢地威風、叻叻豬,有一種虛榮心,男人又需要喺呢啲方面獲取嗎?當然,我唔排除有男人會覺得咁樣做係完全無問題,仲做得好開心,但我只係覺得,女人真係好自私,我完全諗唔到原因女人憑乜嘢去決定男人要咁做先為之「正確」、「需要」,我知,因為女人係生仔果個嘛,好偉大架。同時,亦因為我係一位女同性戀者,所以更加唔明,但同樣地,我都唔會希望自己嘅另一半會當我「男人」咁對待。

其實異性定同性都好,大家都生活喺同一個社會,各自有自己嘅經歷同背景,點解要加咁多外在條件喺男人身上呢,背後有無咩原因都好,我都覺得應該要公平啲,其實大家都只係人啫。呢刻問我如果同個男仔一齊,我需唔需要佢做呢啲「門面」嘢?我可以答你唔駛,WE’RE EQUAL,我只需要一個相處舒服開心嘅另一半就夠,呢啲嘢都係做俾人睇同滿足自己果啲不切實際嘅幻想。