又一位叫自己做Artist嘅藝人

 

 

剛巧前幾日,小明喺某event 上撞番一位好耐冇見嘅男藝人。

轉眼間快接近十年了!從前初出道嘅死𡃁仔已變成大明星,如今在內地十分之受歡迎。可以話要女有女,要錢有錢,非常架勢。

雖然男藝人而家多咗陣土豪味,但講嘢仍然喜歡夾雜啲英文單字呢個習慣。Well -可能佢想give到people一啲比較high class嘅feel啦。

Anyway, 小明仲記得當年曾經訪問過呢位男藝人。 小明個陣啱啱大學畢業,因為對音樂有濃厚興趣,所以走咗去娛樂版寫樂評。而男藝人當時亦係一位啱啱初出道嘅歌手。

記得訪問當天,男藝人因為有要事所以遲咗成三粒鐘。但令小明印象最深刻嘅係在整個訪問中, 男藝人不停咁形容自己為一名 「Artist」。左一句我哋啲「Artist」,右一句作為一名 「Artist」——簡單啲講,就係想標榜自己唔係一個普通人。

何謂「Artist」???男藝人雖然冇學過音樂,唔識樂器。但佢非常鍾情Eason ,偶像係Michael Jackson。平時仲會聽吓張學友同埋睇電影去提升歌唱和演戲技巧。就好似小明欣賞Kobe,喜歡睇英超和研究碧咸點射罰球一樣。可惜,小明至今亦未能成為一位「Athlete」。

當男藝人繼續不斷「Artist」第N次嘅時候,小明終於忍唔住話:

「其實以前啲藝人係唔會叫自己做Artist嘅」。

事緣喺上世紀二三十年代,電影業在美國開始掘起,成就了一班多才多藝嘅表演者。他們個個都能歌善舞,識幾種樂器,猶如現今韓國生產啲明星一樣。

好似Fred Astaire 就係筆者嘅超級偶像啦!出名跳舞勁,被譽為二十世紀最佳舞者之一。就連Michael Jackson嘅舞蹈都係受佢影響。Fred Astaire唔只跳舞叻,仲識唱歌彈琴(佢手琴好勁),曾演出過幾十部電影。此外,打高爾夫球已接近專業水平。

同期嘅仲有Bing Crosby。我諗好多人未必聽過佢嗰大名,但就一定聽過佢首「White Christmas」。而佢最大貢獻就係發明用咪唱歌。冇錯——就係用咪。

舊陣時,「咪」只係用嚟幫樂器作遙距收音,而歌星出碟僅有「Opera Singer」, 因為佢哋把聲夠大。Bing Crosby就係第一個嘗試將支咪放喺咀邊輕輕地唱歌嘅人。點知一唱就紅咗,以至成就今日嘅樂壇。換句話講,如果冇Bing Crosby就根本唔會有現今所謂自稱「Artist」嘅歌手。

最重要是,以上兩位仁兄從來唔會標榜自己為「Artist」。同好多勁人一樣,佢哋會叫自己做「Entertainer」,意思係指以一個表現者嘅身份帶俾觀眾娛樂。成件事變得比而家啲「Artist」更humble,更專業。(sorry, 又不停咁用英文單字添!)

返番嚟十年後嘅今日,男藝人喺event 上表現得非常風騷。雖然小明唔係好聽得明佢啲港式普通話加英文單字,但係冇變嘅就係佢依然喜歡開口埋口叫自己做「Artist」。

可能小明個人比較迂腐啦,但始終感覺做人比較humble 啲好。