愛情並唔係靠試探嚟穩固

 

WhatsApp經常已讀不回,電話好少傾,又唔係成日見面,然後女人就會開始覺得無乜安全感,胡思亂想,再而做出好多無謂嘅試探,為嘅只係想得到男人嘅少許關心同緊張。例如有啲女人覺得男友對自己唔夠緊張嘅時候都會用「靠嚇」呢招嚟測試男友,好無聊,又唔理智,但相信好多人都試過。

「我今日同阿邊個兩個撐枱腳,好晏先返,你唔使等我喇。」
「阿邊個送咗條頸巾畀我做生日禮物,好靚。」
「如果我同阿邊個兩個去旅行你畀唔畀?」

然後得出嘅答案係。。。

「Okay,玩得開心啲。」
「幾靚喎。」
「畀,我信得過你。」

對以上嘅試探,男人表現得毫不緊張,最初可能你會安慰自己,覺得佢咁答你係因為對你完全信任,等大家有足夠嘅私人空間,唔會好大男人咁要管住你,唔畀你同男性友人出街。好可惜,現實中通常都係因為男人有小三,根本無時間同心力去理你,先會顯得咁無所謂,美其名為信任,其實係因為唔夠愛。老老實實,同一時間有幾個愛人,邊有咁多時間去理你嗰啲無謂嘅試探或者呷醋?

愛你嘅人唔會令你無安全感,佢會樂意將你介紹畀同事、朋友,甚至係親人,亦會和異性保持適當距離,以免令你擔心或者誤會,最重要嘅係佢會照顧你的感受。嗰啲所謂嘅試探,N年前我都做過,確實係好攰。而家當然唔使啦,因為從另一半嘅對話同行動當中已經得到充足嘅安全感。況且要出軌嘅人,怎樣點都會出軌,阻唔到亦都防唔到,唔通你以為check佢手機、whatsapp,佢就唔敢偷食喇咩?咁樣反而會令佢覺得你唔信佢,明明咩都無做過都好似畀人審犯咁審,咁不如真係出軌仲抵啲。

所以女人都係應該要對另一半有啲信心,而男人都唔使驚,其實女人很簡單,只是想你緊張多啲關心多啲,例如用以下答案。。。

「你食完飯打畀我啦,擔心你㗎。」
「嘩,佢做咩對你咁好,小心啲呀。」
「癡線!梗係唔得啦!太危險喇!你淨係可以同我兩個去旅行!」

雖然女人聽完又會話你專制、大男人,但係請放心,九成女人都會喺你背後/心入面暗暗偷笑,然後覺得有人咁緊張自己真係好幸福。