同腦細兩個人出trip 就一定會奶嘢?

 

出嚟做嘢少不免都要應酬,有時甚至要同腦細出trip周圍飛,去同唔嘅地方開會,睇下有無機會發展海外市場。有時係成班同事一齊出發,有時係單獨同腦細兩個人去。電視劇成日會出現嘅劇情就係男腦細同女秘書孤男寡女,身處異地兼唔知點解會共處一室,然後無啦啦就會撻著咗,即使大家喺香港已經有另一半。現實又係咪咁呢?我唔知喎,但至少我暫時未聽過。

「我遲啲可能要同腦細兩個出trip,返大陸傾嘢。」我說。
「下,咁危險,唔好去啦。」Mike說。
「我都唔想,但係腦細點名叫我去跟呢個project,無得唔去。」我說。
「你話你男友唔畀你去啦,除非我陪埋一齊去啦。」Mike說。
「梗係唔得啦,咁同見工帶埋阿爸阿媽一齊去有咩分別?」我說。
「大陸好危險㗎,一陣啲人隊你飲酒,比人食咗你都唔知咩事呀!」Mike說。
「你睇劇睇得多啫,無事嘅。」我說。

其實腦細已經有個固定女友,而佢平日喺公司亦對每個同事(不論男女)都好nice,對女同事唔會話借啲二抽水,或者變變態態嗰啲,正正常常男人一個,應該唔會無啦啦月圓就變人狼掛?我知,你又會話「少年你太年輕了」,狼都識扮阿婆呃小紅帽啦,何況人?喂,咁真係要去做嘢,又有得say no咩?相比起腦細,其實我反而比較驚嘅係上到去要同大陸人應酬,你知啦大陸人最鍾意隊酒,唔飲又話你唔畀面,真係食定幾舊牛油或者幾粒解酒丸都未必頂到。

於是返到屋企我又同母親大人報告,連佢都覺得好擔心,話:「返大陸好危險㗎,你又唔識飲酒,你同腦細講你唔飲得酒,飲一杯就瞓低,去唔到啦。」正當我猶豫緊去唔去嘅時候就收到好友Crystal嘅電話,佢話呢個係上位嘅好機會,難得有大project跟,佢問我愛情同工作會揀邊樣,我覺得愛情同工作唔一定要對立啫,點知佢再極端化咁問我:「如果出trip阿Mike就會同你分手,唔出trip腦細就會炒你魷魚,你揀邊樣?」我淨係答咗佢一句「癡線」就上床瞓覺。

「腦細早晨,大陸個trip呢…我…」我說,並準備以飲量差這個理由來拒絕腦細。
「大陸個trip取消咗啦,做咩呀你好驚同我兩個人出trip呀?」腦細Rex笑說。
「唔係呀,我諗住同你講大陸個trip呢…個proposal我整好咗咋嘛!」我說。
「哦,Keep住先囉,總有機會上去嘅。」腦細說。

 

P.S. 同腦細兩個人出trip就一定會奶嘢?可能男同女嘅諗法會好唔同。