中央銀行點樣控制目標利率?

Flickr CC/ Photo byKurtis Garbutt

 

見到某財金分析專家提到聯儲局收水,講及央行資產負債表只係「會計學簡單概念」,並且舉例話「如果有個人本來有X蚊資產Y蚊負債,可以變成X千億資產Y千億負債,佢就係世界上最有錢既人,可以做好多事情」。

我唔知呢個算唔算合適既比喻,係咪佢希望簡化件事等多D人去明白。但係用普通人去比喻制訂利率貨幣政策既中央銀行,對於我黎講絕對係一個「黑人問號」黎。中央銀行傳統上係以公開市場操作去控制目標利率。當利率有可能高於目標水平,中央銀行就會向商業銀行買入各類指定債券,然後向商業銀行釋出貨幣,然後商業銀行得出貨幣,透過乘數效應去拆借(根據存款準備金率),就會增加左貨幣供應。而銀行既結餘增加,反而係中央銀行既負債黎,呢個就係所謂既提升貨幣流通程度。

但當利率操作已經降至接近零既水平而仍然想進一步增加貨幣供應既時候,就有所為既扭曲市場操作亦即係二零零八年金融海嘯由伯南克所做既貨幣寬鬆政策。我相信大家已經對QE好熟悉所以詳細情況我唔多講喇,簡單而言就係中央銀行放寬買入既債券同埋投資產品種類,包括商業發行既各類融資工具,甚至長債,出埋口術,不定限額,做低條孳息曲線,大大釋出可以提升貨幣供應既可行程度。聯儲局係咪世界最有錢我就唔敢講,但亦都只係因為美元係世界既流通同霸權地位,QE先可以行之暢順。

總之,聯儲局既貨幣政策係複雜野黎,唔係好簡單既一回事,不適宜將件事過份簡單去類比。同埋,「聯儲局宣布訂下縮表既時間表同埋做法」,同「聯儲局開始縮表」,亦係兩回事。尋日耶倫亦繼續佢一貫既穩健作風,無特別提及幾時開始,仲要加息幾多次先開始,一切既做法仍然要等待經濟條件成熟再決定。加上伯南克之前講既息口避震作用,相信縮表亦唔會係息口太低果陣就一蹴而就。

最後都係果句:唔識唔緊要,聽人亂講都唔緊要。有疑問的話,自己翻查資料。利申:唔係經濟學家。再深入D我都要問問做金管局既貨幣達人先。我唯一同意篇文既係縮表最終會影響資產價格:但套學術奇人 Raymond Sakura 一句,咪又係阿媽係女人黎。。。