想當年又有樣,又GFable 嘅YUI

 

之前有人講起韓國小天后IU,就令我諗起日本既YUI。

一樣曾經都黎過香港開演唱會(無去真係遺憾黎),雖然無唱到廣東話歌咁勁,但佢都係文化中心對出席地而坐,自彈自唱冧FANS 架。雖則我唔算係YUI 既die hard fans,無辦法將佢既野形容到好仔細,但簡單講句,我好鍾意YUI 初出道既民謠曲風。佢得佢一個,年紀細細,面圓圓咁,拎住個結他,俾Sony 賞識出道既。其實又有樣,又GFable(即好pure 好true),仲識作曲彈結他,雖然一開始有少少雞仔聲,但點會唔大殺四方先?果陣甚至捧到話佢係東方Avril Lavigne 架。

由Tomorrow’s Way(薜凱琪有翻唱,但我覺得完全唔係果回事),Tokyo,以至到Life 呀、How Cracy 呀、I Remember You 果堆,總覺得唱出左少少都市人既寂寞同埋想反璞歸真既感覺,佢把聲,少少冷淡得黎又有種熱情,配埋結他,真係好觸動人心。

Oh Goodbye Days「是嘛」係佢走向高峰之作,雖然佢有份拍既套戲未必有好多人有睇。但講呢首所謂既太陽之歌,同副歌既melogy,我相信好多香港年輕有聽開JPOP 既都應該會好熟悉。係香港任何一家日式餐廳,都可能隨時背景音樂有呢首歌。

Namidairo 呢D灰灰地既歌,撞一撞Cherry 嘅少女初戀心聲,我就算到依家間唔中OT時夜夜地都仲會聽。當然後期開始轉左搖滾曲風,唱死神片尾曲Rolling Star,坦白講,我就唔係好習慣(而更唔習慣係再後期啲既Again 鳥。。。),但果陣佢既碟係日本真係好賣得,好似成日都上Oricon 頭3名。而碟好多時候都仲會有acoustic version 等大家回味番初出道時既YUI。

再後期既Never Say Die、Gloria、Hello等等,我都有聽,但硬係搵唔番初出道果種純真既感覺,加上有D幫年輕人打氣加油歌,對於我地呢啲中坑黎講,已經開始有少少隔隔不入。lol 但anyway都係好聽既,不過可惜既係佢同Sony 開始唔係好咬弦,尤其是係創作同曲風方面。就算休息左一排似乎都無改善,後尾仲毅然決定另組樂團Flower Flower 添。呢個就係令不少高登仔震驚既MK 金毛YUI,令到好多人為之心痛。

YUI 自從2015年打後,奉子成婚生埋孖胎,又話佢確診患上驚恐症之後,已經好少係香港睇到佢既消息同新聞。唔知佢身體點樣。希望佢既生活過得愉快。亦都期待或者佢有一日會出番黎唱歌。IU 依家仲如日中天,時間既野,人生既野,未免教人歎息。

 

(特別揀番張氣質YUI,同IU分庭抗禮下先)