溝女與讀書,其實都係同一個道理

 

 

好多時啲親戚朋友同學都問我點讀書、點解知咁多野(其實唔多,不過好多人未見過大蛇丸痾尿咁解),我都唔知點答好,因為九成唔係臨急抱佛腳就係根本無比時間讀,想點樣忽然變學霸呢?除非本身天資過人啦。

我幫緊一啲學生補習,不幸地全部都係男仔。其中有一個下年會升中六,話之前一路都唔讀書,科科都唔掂,掹掹緊叫做唔洗比人踢出校咁,家下忽然生性,唔想炒DSE,想話追返進度喎。佢就生得OK靚仔嘅,又唔怕醜,一睇我都知係掛住溝女累事架喇。

補補下,個靚仔問我:「我唔想炒DSE,可唔可以教我點讀書?」

我:「無乜特別方法架喎……我最多可以睇到你邊方面特別差就比多啲果類題你做,你唔識果時就引導你有組織咁去思考一個問題架炸。」

靚仔:「但係淨低一年都無……到底追唔追到……我淨係求3322」

我:「咁……呢啲野係天資同勤奮配合嘅,但你都要有心理準備,呢啲問題係積累落嚟。」

靚仔:「其實我都唔算極憎讀書,但係以前又唔想落力去讀,搞到溝女都無時間」

我:「……老老豆豆,讀書同溝女一樣,成個讀書時期唔做,臨尾先想成為大師,簡直係異想天開。」

靚仔:「其實一個人係咪真係無可能忽然讀到好似你咁?」(喇我唔肯定佢講緊毒定係讀)

我:「咁你覺得我有無可能忽然變情聖呀?」

靚仔:「無。」

我:「無錯喇,做下一題啦!」