香港個個月都有「結婚節」展覽

 

 

我記得我之前寫過下「求婚就係鬥燒錢」同埋「婚姻只係兩個人件事係大錯特錯」呢個亙古不變既真理。於是兩小口子本來只係想「簡簡單單」,但就因為「阿爸阿媽or whosoever」,你地其中一個就會開始提議,不如黎緊有個「結婚節」都去睇下啦。都唔一定要去買任何野既,咪當去睇下再係交下差算囉。

但當你以為你地仲可以保持「眾人皆醉我獨醒」既時候,對唔住,旁白已經悄悄幫你配上「兩個人已經開始走上果條燒錢既不歸路」既效果音配上貝九交響曲。我亦都相信,只有香港先會有咁變態,膽敢將「結婚」都可以當成一個「節日」去炒花生搞生意,而且呢D展覽仲可以好生意到幾乎每個月都有得搞。你如果唔信,得閒經過巴士站或者地鐵廣告燈箱,佢地既廣告係隨時密過七十一既。

好勒,準備好晒入去戰場俾人老屈未?千祈唔好以為你係去緊珠寶展,D人員會好安份咁你鍾意就睇下唔鍾意就唔call 你放你走喎。當你一行左入去,就會即刻俾一堆人圍住,你一路行,佢一路跟,鍥而不捨過地產經紀,一邊遞紙俾你一邊問你:

「你影左相未?」
「你book 左酒席未?」
「買左戒指未?」
「租左婚紗未?」
「買左蛋糕未?」
「過左大禮未?」
「做左XXXYYYZZZ未?」

好多時候,你如果想禮貌地拒絕佢地的話,佢地就會即刻好似望住一個已經末期既癌症病人,加一個半安慰又半責怪既語氣,話:「下~~~你咁遲都未。。。。。呀!!!」之後佢會開始話你知,其實雖然遲左好多,但係要「做得禮面」,「一生人得一次」,「呢D錢唔慳得」,佢就會建議你依家快D補番數,以免「屋企人唔開心」/「你地真係認真考慮下呢種人生大事係唔錯得」。

好多時候,一對新人,本來都唔算好唔放心,都會俾呢D氛圍,搞到好很緊張。個情況就好似我想個仔女開開心心長大得喇,點知所有家長都係度同你搶搶搶搞resume 搞面試搞贏在起跑線搞十項全能,你就會開始諗:死,如果我咩都唔做,我咪會好蝕底?而身邊既另一半,亦都會開始動搖:

『不如我地都係做番____囉。』其實佢地既做法同佛地魔差唔多,控制人既思維,就係要恐嚇。係愛呀哈利,但愛既反面,亦可以係恐懼。生命中不能承受之輕,莫過於此。一跌左第一個銀,跟住所有錢都跟住佢。等於D賤精呃人上床前,往往都話只係攬攬錫錫--呢個世界所有騙局都係同一個玩法。。。

但係!凡事要向好既方面諗。恭喜晒先,咁你又開始為成個婚姻行業提供左經濟增長同埋創造職位既機會。我代表業界多謝你。由完全唔搞,跟住行下又變左影一度地方婚紗相,再說下就變左加埋巴黎京都,仲有化妝呢?婚妙呢?中式裙掛呢?瘦身療程呢?酒席升級有夢幻theme 呢?backdrop 呢?印3D立體喜帖呢?

你想提荷包著急都無用。因為鐵達尼號沉船,已經開啟,個荷包就好似阿Jack 咁,沉左落去冰山深處再深處。唯有好聲安慰一句,一個港式婚禮,錢解決到既,已經唔係問題。因為有更多,係錢都解決唔到既。