一個車位,五百萬,係咩玩法?

 

首先,區內好多既車位會即刻封起唔買。甚至坐地起價,隨時下一個車位既成交,就會係550萬,甚至係600萬。

然後,區內又會有好多既住宅細單位又會封盤。因為佢地既諗法係:痴線架,車位都咁貴,我地係住得人又有廁所俾人痾屎又有得俾人沖涼又盛,就算係劏房都可以賣貴D啦。於是佢地又會係經紀既推波助瀾下,又將個叫價再叫高D。但又真係唔明喎,真係又有人會承到,果度好野。

好喇,跟住連劏房又擦出癲價之後。對面既大單位阿嬋,或者三叔公,當然亦會見獵心喜,佢就會打電話講:我地呢D大單位,區內仲唔買少見少?車位600萬,劏房900萬,我地呢個單位就算唔向海,都望到香港大學少少,你驚會租唔出?一於賣到去三萬蚊呎啦!!

跟住分析師就會開始吹奏喇:西區樓價創左新高,受利好消息刺激呢(黎黎去去都話加息慢呀,流動充足呀,經濟好好呀,失業率低咁架啦),其他區又會開始追落後喇。於是太古城又要追寶翠,城市花園又要跟入,之後就開始到黃埔九龍東,然後仲有新界呢?荃灣西呀沙田大圍甚至天水圍呢?(SORRY最後先到將軍澳同日出康城。。。)「基本因素良好,現在入市良機」呀~~

所以,樓價梗係只升不跌架。大家都想止升不跌架其實。念力黎架。所以好多人叫癲價果陣,其實暗地裡,不知幾開心。正如高人方老話:香港就係一個傲嬌既城市。。。