大佬呀,唔該做下好心啦,食飯帶一帶個腦去呀

(photo via cc Flickr user Sami Keinänen)

 

話說小毒女都做咗幾年飲食業part-time,唔知點解次次做做下樓面都會俾人掉咗去水吧。

雖然做水吧唔洗對住啲麻煩客,不過其實做水吧好_chur,尤其小毒女做親都係啲有lunch set嘅餐廳,一到繁忙時間啲單瀑布咁湧出嚟,廚房都話有幾個爐一啲焗嘢一啲炒嘢分下工未必張張單中,水吧無得諗,set drinks全部食晒。遇到同時有成十張凍檸茶單不過杯杯唔同要求:走甜、少甜、少冰、走冰、走甜走冰、少甜少冰、少甜走冰、走甜少冰、少檸檬、茶淡啲、茶濃啲你都咪話唔煩。

不過咁,最辛苦都唔係呢樣,係見到啲無腦嘅order小毒女會自動燥底,一日燥幾鑊都咪話唔辛苦。睇到呢度,你可能會問:無腦嘅單?即係點?

即係嗰啲叫齋啡走甜/齋啡走奶嗰種,喂呀,有糖有奶叫齋啡咩?算,呢啲都唔離譜,最離譜嘅係嗰啲叫奶昔走奶呀、沙冰走冰呀嗰啲。齋啡嗰種單我都叫做可以照整最多心入面笑你低能,奶昔走奶、沙冰走冰點整呀?整唔到我又要搵同事或者自己行出嚟同你講整唔到,叫你轉嘢飲,咁樣嘥大家時間好咩 :(

大佬呀,唔該做下好心啦,食飯帶一帶個腦去呀,小毒女唔想燥到爆血管呀。