香港網民世界第一,特別係乞人憎個方面

 

 

最近有幾個朋友不約而同係Facebook上講起,香港人,特別化身成網民既時候,都會變得相當討厭。講到世界第一就係誇張架啦,但原諒我無乜國際視野,當住係先啦。世界第一既乞人憎,具體黎講主要係有啲咩罪狀呢?

 

特別挑剔——對所有自己睇唔順眼,或者只係睇唔慣,未見過既野非常挑剔,彷彿人地欣賞一樣自己唔鍾意既野,就一定係因為對方品味差、奇怪,然後就百般侮辱。「呢樣野其實無咩特別,你睇個其實乜乜乜都唔係好夠乜乜乜,垃圾。」其實有意見好正常,但成日見到啲網民一開口就侮辱到人地食狗糧咁,又好難怪咁令人討厭。

 

特別自大——覺得個世界係圍住自己轉,除左挑剔人地既喜好之外,最鍾意就係話畀人知自己有更好既意見。見到人地讚碗麵好食,佢地就會留言「呢間其實好普通,有無去過乜乜乜個間乜乜乜?個間好食好多。」見到人地去旅行,就會話「一定要去乜乜乜,無去過不如唔好去個度啦」得罪講句,好多時呢啲人其實無兩間都食過,留言純粹係想話畀人知自己既品味比你高。

另外有一種仲可愛,見到自己唔鍾意既野「咁都介紹,垃圾PAGE,即刻unlike。」「你再講埋啲乜乜乜,我就unfollow你。」大佬,無人在意呀,hide all又好unlike都好,唔鍾意睇就走啦,宜家人地欠左你要專講你鍾意既野咩。大爺咁既態度但又想人ugg你,見到都笑出聲。

 

特別賤嘴——見到女人自拍,「太肥」「PS過黎?太假」「隻手,隻腳咁粗既?」「整過容黎?」「失敗左?」「好醜樣」或者「好靚,已J」「好大波,幾錢?」「對腳可以玩一個月呀」等等等等;見到有意外,有慘案既時候,又會有班人出黎覺得自己好幽默咁,好似人地無左條命唔緊要,我用佢條命去娛樂人緊要啲「咩強姦姦殺?勞資糾紛啫」「拖行二百米?我痴住張膠紙行路都feel到啦」,其實相當唔好笑,但你試下去各大新聞平台睇下啲留言,蔚為奇觀。

 

其實仲有再多啲,簡單黎講就係樣樣野都好極端:我講既就係世界第一好,其實人都係垃圾,抽水我要做最賤個個,人地有成就一定係父幹,男既有人包女既做雞,自己既成就就因為自己努力,但當要鬥慘既時候我又要變返最慘個個,女人永遠都係假相,我既相係執過但就唔係假既,你個page賣廣告你變左,呢個女人著得咁性感一定係雞,PM佢問價先等等等等。所有野可以彈既就彈,無野彈都要格硬搵啲野黎嘈,對方講A就要話人唔識B,到人地講B就要笑人唔識C,無論點講,結論都係我比你叻,比你醒,比你見識多,比你有品味。

最利害既地方係,好多講出呢啲賤格說話,侮辱人唔使本既人,都係有名有姓有相有朋友既真身。到底係佢地以為自己講過既野無人知,定其實真係唔在乎呢?有老婆仔女既人係個o靚模facebook留句已J,成地都係,打到停唔到,順手PM問埋價,佢地真係唔覺得有問題咩?係一件慘劇發生,明明個死者你唔識,留句抵死,勞資糾紛,真係無問題?好明顯有,但每日就係不停出現,不斷發生。我惟有好佩服講句,佢地真係好勁,背負住自己既一切就係為左一時口快,我真係做唔到。

可能有人第一時間睇完標題就跳出黎講,咩呀,乜乜乜地方啲人仲賤啦,佢地仲口臭啦。基本上個啲人係睇唔到呢段,由佢地。我想講既係,可能香港網民係成個世界黎講其他唔係最賤最討厭,但乞人憎就係乞人憎,唔係要同人比較先知既。

我有位網友成日講「做人無禮貌狗都不如」,我想補充多句,「做人無自知之明、唔知訂既聽食屎啦。」