中電繁忙時間附加費只係巧立名目補貼商家

中電提出「分時段電價」試驗計劃,未來一年選擇2.6萬個用戶安裝智能電錶,用戶在周一至周六晚上6至10時繁忙用電時間(公眾假期除外),每度電電費貴0.6元,即較現時貴近5成。

根據統計,喺二零一六年二月份,香港嘅用電量約為 10,000 太焦耳,可將之視為用電的基本需求。照明、煮食、升降機、水泵之類係唔可以話你加電費就突然變成有夜視、唔使食、唔搭𨋢、唔用水。可以控制得到減少使用嘅電力主要係空氣調節方面,而空氣調節用電量亦係總用電量嘅 31%。正所謂凍都可以著衫,熱冇得剝皮,而且香港處於亞熱帶地區,用於保暖嘅電力係相對較少。用電最高嘅月份係七月,而當月平均日照時間為全年最長,平均溫度為 29.8 度,最高氣溫達至35.6度。即係喺呢種天氣下面,多咗本來唔會開冷氣嘅人,都頂唔順要開。

 

資料來源:統計處

 

資料來源:香港天文台

 

資料來源:機電工程署,香港能源最終用途數據 2016

 

當然,要慳電都有啲辦法嘅,例如你返到屋企,最熱果陣開冷氣再開風扇,涼返嘅時候就熄咗個冷氣淨係開風扇。但係你返到屋企嘅時候就係最貴嘅六至十點,咁你可以落商場food court 坐到十點,或者可以選擇留喺公司OT到十點先好返屋企囉。

睇返香港嘅人均用電量,其實喺過去呢十零年都無點大幅增加。反而近二十年最高用電量果年係一九九八年。而總用電量增加只係人口增加嘅問題。

 

資料來源: 香港社會服務聯會

 

咁我地又睇下香港嘅用電量分布,原來住宅用電,即係最影響到一般市民嘅果一部份,只係佔總用電量嘅26.48%,而工商係有70.62%!大部份嘅工商業都係上午九點到下午六點營業,其實又何來下午六至十係用電高峰呢?更甚者係,以三成電力用於空氣調節嚟計算嘅話,有日照嘅時間理應用電較多。下午六至十加價,其實只係用嚟補貼工商用電。

 

資料來源:統計處

 

再點慳都好,人均用電量都唔係重點。跟據相關報導,電力公司其實係想減低繁忙時間用電嘅需求,即係所謂嘅「峰值」,從而減少發電機嘅數量,以免日後會增加電費。即係,首先喺而家加咗你地市民用嘅電費先,然後喺日後就唔會加你電費喇。唔該晒。

即使係喺平均用電量慳咗,面對極端天氣,例如好似早個星期咁,又唔落雨又吽風,濕度高到吸呼有困難嘅日子,三十幾度都會多咗人用冷氣。峰值依然唔會有太大改變,如果佢用平時嘅用電量嚟估算呢個峰值,好可能會因為突然間增大嘅用電需求而導致大規模停電。當然電力公司先唔會咁傻,係會有安全系數嘅。講到尾,發電機始終要為咗面對極端情況而起,成本一直都存在。錢又借啲意收多咗,加價壓力仍然存在,講到幾大都冇用。