德意志城邦論

新天鵝堡(巴伐利亞國王路德維希二世的行宮之一)(photo via cc Flickr user Polybert49)

 

德國聯邦州制度點嚟呢?

1871年德意志帝國成立,係參與德意志帝國嘅日耳曼民族主權國家,一齊交出部分主權畀帝國,本身就有類於今日香港嘅情況:明明應該係獨立嘅,但軍國大事交由另一主權實體處理。

所以德意志帝國嘅結構,其實就係一個帝國政府,由26個類似今日香港嘅政治實體組成(另外帝國領地阿爾薩斯洛林)。呢26個政治實體入面,其中一個:普魯士嘅君主兼任帝國嘅君主,某程度上扮演住依家中共嘅角色(中共有文化大革命,普魯士主導嘅德國都有文化鬥爭,攻擊天主教勢力,雖然冇中共咁野蠻……)。香港嘅狀況就係好似其他25個帝國成員咁。

26個德意志帝國成員國,都保留自己嘅原有制度,除咗3個自由市本身冇君主之外,其他嘅君主都依然在位。名義上佢係一個帝國,結構上佢係一個聯邦。就好似今日嘅馬來西亞咁,各邦(州屬)有自己嘅君主或元首,共奉一個最高元首,而各邦喺一定事務上可以各行其事。不過唔同嘅係,馬來西亞最高元首係輪任,而德意志帝國皇帝係由普魯士國王世襲;而且馬來西亞以聯邦自命,而德意志帝國以帝國自命。

呢26個成員國,除咗其中一個薩克森勞恩堡,因為佢嘅君主本身就係普魯士國王兼德意志皇帝,所以1876年就併入普魯士之外,其他25個都一直存在。只要唔係軍國大事,佢哋都仲有話事權。例如話,一個人有冇德國國籍,都係由呢啲成員國政府決定。好似話愛因斯坦佢一度放棄德國國籍,但佢成名之後獲得「普魯士王國」嘅公民權,又重新入籍德國。再遠少少,希特拉1932年之前都係個旅居德國而熱衷於德國政治嘅奧地利籍人士,1932年佢為咗參加德國總統大選,先至由 Braunschweig 自由邦政府度獲得 Braunschweig 嘅公民權,咁先可以去參加總統大選。

時間到咗1918年,德國於第一次世界大戰落敗,全國爆發革命,而各成員國君主亦十分識趣咁退位走佬。25個成員國全部改組成自由邦。冇咗君主之後,就開始出現成員國合併嘅呼聲,部分地理位置接近、規模細嘅自由邦就開始合併:例如圖林根一帶幾個小邦合併成新嘅圖林根自由邦,除咗哥堡選擇併入拜仁冇跟到;另外畀普魯士自由邦完全包圍嘅華督皮蒙亦都併入普魯士。但各邦依然有高度嘅自治權,但同樣有「普魯士獨大」嘅問題,安哈特呢啲小國,同埋漢堡、不萊梅呢啲城邦依然存在;而普魯士呢啲大國亦唔願分拆。

1933年,納粹德國當政之後,喺法西斯主義嘅理念之下,厲行中央集權政策。納粹執政初期,仲會將部分邦繼續合併,但到咗1938年,納粹德國索性將邦虛級化,成立「郡」呢種行政單位,攝奪邦嘅事權。郡制好處係每一個郡嘅規模比較平均,但同德國建國時嘅聯邦體制南轅北轍。二次大戰結束之後,郡制亦告廢除。

二戰結束,對德國嘅「善後」方式,當中亦包括咗邦份改劃。首先,「普魯士自由邦」被視為德國侵略性嘅來源,盟軍決定消滅其建制。於是,盟軍佔領其中一項工作就係喺原普魯士領土上面就成立新邦,現時德國各邦,除少數幾個(拜仁、漢堡、不萊梅、圖林根)之外絕大部分都係當時新成立嘅。不過,東部五邦好快就因為東德成立,赤色法西斯又再厲行中央集權,喺1952年就廢除咗,直至1990年先重新建邦,以便併入西德體制之內。當時亦成立咗現存德國城邦嘅第三個:柏林市。

睇返成個制度發展嘅脈絡,可以見到,德國嘅聯邦州制度係源於神聖羅馬帝國嘅封建體制。神聖羅馬帝國解散之後各個封建領地成為各個日耳曼民族主權國家,然後佢哋再交出主權建立德意志帝國,建國時各邦保留嘅權力就係聯邦州制度嘅起點。我哋會見到,香港嘅景況原來同德意志帝國嘅小成員國非常相似,某程度上亦都係所謂嘅「一國兩制」嚟,只不過普魯士遠不及中共野蠻──之但係共產主義本身就係普魯士精神嘅糟粕嚟囉。另一個分別就係,又冇咩德意志成員國因為畀另一個成員國欺壓而要求脫離咁囉。

但話分兩頭,陳國師又提城邦論,又話邦聯論,講嚟講去其實就係將我以上講緊呢個聯邦州制度嘅發展歷程,以中共同香港作為主角重新講一次。所以我先會話 #香港城邦論只係德國聯邦州制度嘅中文翻版。咁你話如果真係可以共建一個德意志聯邦共和國出嚟就話啫,弊在佢係要同普魯士嘅殘渣一齊建國呢。咁搞法就真係敬謝不敏囉。

而且,既然德國聯邦州制度就係一種一國兩制,咁樣根本城邦論就係同一國兩制同出一源加殊途同歸,亦唔難解釋點解城邦論會變成「永續基本法」。因為一國兩制就係靠基本法運作,同出一源又殊途同歸嘅城邦論亦都需要基本法。咁你仲同我講陳雲真係為香港好?

呀~不過香港人幾豬都唔豬得晒,陳雲得票仲低過鄧家彪、全港熱普城得嗰十五萬票(超區末席係廿四萬票呀即係有熱普城選超區都會輸畀王國興呀)、新界西冇得揀先選出個扯白旗旗主。至少,香港人都仲知道,同中共一齊建立聯邦,同依家畀中共欺壓,係一鳩樣架囉~~