執紙皮皆因老人對「坐食山崩」的恐懼

(photo via cc Flickr user Kelsea Groves)

 

有人話老人家執紙皮、汽水罐係因為唔想浪費,咁你解釋唔倒點解呢班老人家連新輯輯嘅免費報紙都去排──直接拎未睇過嘅報紙賣,擺明就係一種浪費。

真正嘅道理其實唔難理解,因為就好似好多Slasher、Freelancer去到好一排時間無生意,結果幾爛嘅Job都走去接嘅概念一樣,純粹係基於未來缺乏安全感嘅情況下,搵得一蚊得一蚊。

對於呢班老人家黎講,件事就更簡單:基於佢地處於退休狀態,時間成本已低至近乎零,任何可以增加收入嘅方式,只要Cover倒本身交通或者身體成本(即係唔會搞到病咗、又或者賺番黎買嘢食補充番額外消費嘅體力),對佢地黎講都係值得去做;

進一步講,同年青人仍然持續有收入相比,「無生錢入」對老人家係有一個好大嘅危機感,好多老人家可能去到七十歲左右,開始發現自己積蓄只剩番一半以下甚至幾份一之餘,生果金收入又唔夠日常洗費,於是就會用盡任何方法產生收入。相比起「唔浪費」、舒緩呢種「唔知到死果日仲夠唔夠錢駛」嘅危機感,先至係點解收入咁卑微老人家都要爭住去執垃圾回收嘅原因。

由於安全感係一種主觀感覺,所以政府係好難完全根治呢個社會問題,但係要舒緩佢嘅嚴重程度的話,你就要去諗,究竟1,290元生果金,2,495元長生津3,435元老人綜援夠唔夠佢地一個月最基本洗費?如果夠洗有剩,好多老人家先有餘裕去諗「咁辛苦為乜」呢個問題