媾港男要講道行

(photo via cc Flickr user Calvin Lee)

 

簡直係修行,堅經驗談。

原來媾港男係一條咁迂迴曲折既路。

首先,你係唔可以咁進取既。一般來講,港男都慣左港女既高竇和冷酷,如果你太健談(都唔係講緊desperate,係吹得水o者),係會令佢地覺得條女做乜野咁努力,唔慣既,會唔同你傾落去。

跟住,你係唔可以咁強既。坊間都有對於三高女既熱烈討論,港男係鐘意D日女﹑台妹果種賢妻良母既人,所以先覺得有錢有樣又做得野既港女好惡﹑唔溫柔﹑似老虎乸。個人黎講,我覺得溫柔和強唔係相對既,日本既歷史當中,就有大和撫子﹑篤姬等,又賢慧又把炮既女人,都係日男既理想老婆黎既。Anyways,總之你個感覺太強悍,唔小心令人聯想到蒙古大漠騎馬奔騰既女子,港男覺得自己瘦瘦既身軀無法保護到你,甚至要你保護番佢轉頭,咁係好唔得。

第三,進展係慢既。呢個,當然視乎港男係肉食男定草食男啦。不過根據我係Tinder上面既聊天紀錄,同港男傾偈,唔知點解隔好耐,傾埋哂D天馬行空到吃飯行街,都仲未約你去街既。咁我就以為佢都係想搵個人吹下水啦,所謂既鍵盤戰士,其實唔係真係有心出去;但又唔一定架喎,佢又好似好Keen咁架喎。米多莉就試過,傾左成三個月之後,終於約人出去囉。所以相對於鬼佬吹兩句水就約見面,與港男既速度覺得係龜兔賽跑咁神奇有趣丫。

最後,講咸野呢種咁冇女性矜持既野,係唔獲得港男既青睞既。你床上既功夫如何,就在床上展現;如果你係對話中有出位既黃腔,港男可能就覺得你係淫X。其實係唔係淫X,同你講唔講咸野真係冇咩關係。但大腦直線發展既港男,就唔buy囉。可能係睇得日系AV多啦,唔嗲唔吊﹑霸王硬上弓呢一種先有挑戰性。

咁當然啦,一樣米養百樣人,好多港男都唔係走極端既路線既。但如果你係想媾港男,但個性開朗直率,可能就要係鍵盤上收一收,忍一忍。如果忍唔住,我建議你睇一睇孫子兵法,或AV,下一下火先,唔好亂大謀呀。

港男,點解你咁難追架o者。