住喺中國,我先開始明白點解中國人咁「變態」

 

黎到呢度之後其實個人一直都幾鬱悶下,而原因真係好複雜,最主要係,中國唔似香港或者荷蘭或者美國,呢度所有地方都無情咁提醒你你喺中國。即使係最努力扮成海外情懷嘅嘢,一個香港人都會睇得出佢係中國嘢。

慢慢地,我養成左一種好似食煙咁,可以解壓但實際上對自己傷害極大嘅習慣——睇google map、睇啲長途火車旅行嘢、睇背包客棧、睇連登旅遊台,想像自己會去一場旅行、一次探險,想像自己暫時可以離開呢度、面對一啲on9到爆嘅嘢,令自己暫時忘卻現實,去一次房間入面嘅旅行。

但事實上係,我根本走唔到出去。越睇呢啲嘢我就越想出去旅行,然後發現自己根本毫無條件咁做,係連去下日本都唔得,下次返香港都唔知係幾時;去其他中國地方我又毫無興趣,因為咁樣對我黎講真係冇離開過呢個地方。我越想留係度,我就越想出去;我越想出去,我就越發覺自己走唔到。結果,我就只會變得越黎越鬱悶。

但我真係冇辦法戒甩呢個習慣。一個出慣去、接觸過(應該係,除非唔係)外面世界嘅人,就好似一隻自由開嘅雀仔咁,根本唔會慣留係一個文化極爲單一嘅地方。就算你要強調走地雞都係雞,你都唔會可能將佢放入去籠入面同廿幾隻雞一齊迫。

我開始明白點解中國人咁「變態」。唔好想像呢度係一個受高壓統治人民受嚴密監視嘅地方,因為事實更加恐怖。認真咁去睇,你會發現呢個國家好排外,而我想講嘅排外唔係義和團或者納粹個種,而係一種睇落好開放,但實際上極之自我防護封閉嘅精神狀態。我拎8000人民幣一個月,竟然已經叫比呢度freshgrad拎多一倍。唔靠父幹嘅話,佢地真係頂盡join零團費團去香港見下世面;百度搜狗優酷搵到嘅嘢基本上都係中國嘅網頁,同google youtube比真係蚊髀同牛髀;佢地拎到有關外國嘅嘢,十之八九都係secondary/tertiary source,而呢啲source往往都係帶住極大嘅偏見寫嘅,新假期食玩買嗰啲喺佢地面前簡直就係清泉。

恐怖嘅係,佢地唔係唔知呢種「國際」係被建構出黎——但佢地更相信呢種現實、滿足於呢種想像。你話比佢地聽呢啲有另外一面,佢地會先話你識條鐵,再話你扮野、殖民餘孽。佢地出過去嘅人,返到黎一樣仍然係同一種mindset;外國經驗根本就冇變過佢地,改變到嘅只係佢地嘅階級。佢地絕大部分人根本就係柏拉圖所講嘅洞穴人,仲要係冇人綁住都唔肯出去見下陽光下嘅世界個種。呢種精神狀態,真係好癡線好癡線。見過呢種分別,我諗我真係永遠都做唔到中國人。