如果生命可以重來一次,你會想由哪一刻開始?

 

 

近排睇咗《29+1》,最深刻係呢一句:「如果生命可以重來一次,你會想由哪一刻開始?」我即時喺心入面問自己,然後以前嘅回憶片段就好似菲林咁好快閃過,好快我已經得出一個答案:「唔使再嚟喇,因為我已經好滿意而家嘅生活。」其實連我自己都對呢個答案有少少驚訝,二十幾年嚟,真係無一樣嘢會令我後悔過?有,我都有做錯過決定,信錯過人,亦都錯過咗好多嘢,但係人生就係咁㗎啦,跌過痛過失去過,先會更加懂得珍惜。

好多人都會話:「如果有得再嚟一次,我一定唔會點點點。」但係大家都知道呢個世界係無叮噹,無得坐時光機返轉頭,發生咗就唔會再改變到,所以做每一個決定之前,我都會問清楚自己,係咪無論結果係點都唔會後悔?如果係嘅,我就會衝,咩都唔理,當然如果最尾真係奶咗嘢都無得怨,要自己承受返。我唔係好叻或者好醒目嗰啲世界女,讀書同做嘢都只係盡力做好自己本份,我永遠都記得嫲嫲以前成日同我講:「盡咗自己能力就得。」

究竟一個人點先算係成功?有錢?有地位?有權力?我好簡單㗎咋,開開心心,咁就已經好成功。你估開心咁容易㗎?有好多人有錢都未必開心,可能仲有抑鬱。知足常樂,呢句嘢真係好老土,但其實又好啱聽,至於點先可以做到知足,好可惜係無得教嘅,只可以靠自己去調節。如果以開心為成功嘅指標,咁我諗我嘅人生暫時都算係幾成功。

我唔係咩富二代,又唔係咩大公司高層,我只係一個小薯仔,有份穩定嘅工作,雖然點儲錢都係買唔起樓,但我有好鍚我嘅屋企人同男友,有一班會陪我癲,成日問我幾時結婚嘅好姊妹,有一本屬於自己嘅書,有一班真心嘅讀者(直覺覺得XD),咁都已經好心滿意足嚕。

「如果生命可以重來一次,你會想由哪一刻開始?」