【識食一定食__】邊個星座嘅男人性能力最好?

 

雖然前排先寫咗篇文叫大家唔好盲信星座,不過,呢頭講完嗰頭又有好笑嘢分享。

話說有位四十出頭嘅女子,雖然要稱佢為後生女有啲勉強,但我好肯定佢仲有一顆玫瑰色嘅少女心,結過婚,有個女,食菸食咗廿年搞到皮膚豆皮咁,啲牙就更加唔好講,黃過黃椒。

但點解我話佢少女心呢?因為佢堅信咁樣嘅佢,係仲可以搵到個有錢成熟嘅男人照顧佢母女,「我目標好簡單,每年去一次歐洲。我咁大個女,最遠都係去過新加坡。」

咁當時我同佢開牌,都好婉轉咁同佢講咗「黎緊呢年要搵到咁嘅對象有啲難度噃」,但空虛寂寞凍嘛,後尾呢,呢位女子搵咗個住深圳嘅中港司機,話雖然司機份人唔係好比到安全感佢,但係,「佢都有錢架。」

女子口中嘅有錢,係月薪多過佢份工,我都唔記得係倉務定收銀,總之唔夠一萬一個月,「而家有埋男人份糧,可以住豪啲啦。」

我唔深究佢對「有錢」同埋「豪啲」嘅定義,我淨係知佢始終到而家都未去到歐洲,前排好似去過福州嘅。我一直諗住「個客開心咪得囉」,加上我好少私底下過問個客嘅私事,見佢一排唔搵我,我梗係祝福佢幸福架。

然後,尋晚,佢 PM 我問咗樣好爆嘅嘢。

「神婆,我想問邊個星座嘅男人性能力最好?」

話說當時我當同仁上下開緊 PS4 Party 講緊無聊嘢,此話既出,全班人一秒爆笑。

而我呢,真係唔知應該反白眼定係笑出聲。

邊個星座男人性能力最好?
咁同問香港邊個男人性能力最好其實係無咩分別!

首先床事呢啲嘢真係人夾人,有人講究形狀、有人講究大小、有人講究時間性、有人鐘意格雷的五十度陰影總裁 Play……

其次,呢個問題嚴格黎講係統計學嘅問題!
即係咁,你問我雙魚座嘅女性係唔係普遍多愁善感多嘢諗啲,我都可以從見客經驗中答你一句「都係架」;但係,個客而家問緊性能力噃!呢個問題去問各界別性工作者,我諗佢地都答你唔到啦?

有無鳳姐牛郎私鐘乜春都好啦,會喺接客之前問恩客「呀係呀,我做緊 Research,我想問阿生你咩星座架?」咁樣先開工呀?完事之後係咪要入 Record 落電腦 Mark Excel 添呀?

如果有人咁好學請介紹我識,我都想增廣見聞呀。

所以,邊個星座男士性能力最好?我真係唔知點答。

咁其實個客之所以問呢個問題,係因為網上好多地方話佢男友個星座「性能力持久」,但係,個男人已經有幾個月無同女子有親密身體接觸。

其實如果係咁嘅情況,已經唔關性能力好唔好嘅問題,因為你連性行為都無噃!呢啲時候唔係應該諗「男人係咪好攰」或者「佢係咪出面有第二個食飽咗」之類嘅問題架咩?

我有咁同佢講架,但係女子對自己好有信心,覺得一定唔會係自己問題,而係個男人性能力出咗事先唔掂自己。

咁我咪惟有同佢講,「呢啲疑似生理障礙嘅問題,占卜幫唔到你架,一係你直接問對方睇下咩事先啦。」

老老實實,我唔擔心佢或者個男人呀,我擔心佢個女咋,今年先幾歲,個阿媽咁樣,第時都唔知點算。